Батыс Қазақстанда трактор аударылып, екі адам қаза тапты

ОРАЛ. ҚазАқпарат - Батыс Қазақстан облысында трактор аударылып, екі адам қаза тапты, деп хабарлайды ҚазАқпарат тілшісі.

БҚО полиция департаментінің баспасөз қызметінен түскен мәліметке қарағанда, оқиға 26 тамыз күні Бөкей ордасы ауданында болды.

Шамамен сағат 10.30-да аудан орталығы Сайқын ауылында трактор аударылып қалды.

Соның салдарынан 1994 жылғы ер адам мен 2013 жылғы қыз бала көз жұмды.

Қазіргі кезде ҚР Қылмыстық кодексінің 345-бабы 1-бөлігіне сәйкес сотқа дейінгі тергеу амалдары жүргізілуде.

Еске сала кетейік, бұдан бұрын Оралда полицейге пара бермек болған мас жүргізушінің ұсталғанын жазған едік.

Сондай-ақ БҚО-да қостанайлық алаяқ 82 жастағы әйелдің 1,9 млн теңгесін жымқырып кеткен.