Батыс Қазақстанда қызылша жұқтырғандар саны сексеннен асты
БҚО қоғамдық денсаулық сақтау департаментінен алынған мәліметке қарағанда, өңірде күні бүгінге дейін 82 адам осы дертке шалдықса, соның 45,1 пайызы - 14 жасқа дейінгі балалар.
Бір жасқа дейінгі 14 сәби қызылшамен ауырған, бұл - балалардың 37,8 пайызы.
Қызылша, әсіресе, Орал қаласында белең алып тұр, мұнда 54 адам сырқаттанса, сондай-ақ Бәйтерек ауданында - 8, Бөрліде - 7, Бөкей ордасында - 6, Сырымда - 4, Теректіде 3 жағдай тіркелген.
Аурудың алдын алу мақсатында 1 сәуірден бері 9-10 айлық сәбилерді, 40 жасқа дейінгі медицина қызметкерлерін және қызылшаға шалдыққандармен қарым-қатынас жасағандарды егу жұмыстары жүргізілді.
Сәуір айында 2074 бала (95,2 пайыз), 1550 медицина қызметкері (97,2) және қызылшамен ауырғандармен байланыста болған 108 адам егілді. 9-10 айлық сәбилерді қосымша егу жұмыстары желтоқсан айына дейін жалғасады.
«Қызылша пневмония, бронхит, энцефалит сияқты ауруларға, тіпті қаралмаған жағдайда өлімге апарып соқтыруы мүмкін. Сондықтан одан сақтанудың жалғыз жолы - екпе алу», - деп хабарлады ҚазАқпарат тілшісіне аталған департаменттен.
Еске сала кетейік, бұдан бұрын БҚО-да қызылшаға шалдыққан 14 жасқа дейінгі балалардың барлығы екпе алмағанын жазған болатынбыз.