Батыс Қазақстанда 60-тан астам көлік қар құрсауынан құтқарылды

ОРАЛ. ҚазАқпарат - Батыс Қазақстан облысында 60-тан астам автокөлік қар құрсауынан шығарылды, деп хабарлайды ҚазАқпарат тілшісі.

Облыстық Төтенше жағдайлар департаментінің баспасөз қызметінен түскен мәліметке қарағанда, оқиға 17 наурызға қараған түні Тасқала ауданында орын алды.

Сағат 00.11 шамасында Тасқала-Аққурай жолының 3-9 шақырымы аралығында 59 жеңіл көлік, 5 «ГАЗель» және 1 «КамАЗ» автокөлігіне көмек көрсетілді.

Бұл көліктерде барлығы 138 адам болған, олардың 8-і - балалар.

Кеше бұрқасын соғып, желдің жылдамдығы секундына 14 метрге дейін жетуіне байланысты облыстық маңызы бар осы Тасқала-Аққурай-Болашақ жолында барлық көлік түрлері үшін қозғалысқа шектеу қойылған болатын.

«Аталмыш жол қазір де жабық. Басқа жолдар ашық», - деп хабарлады ҚазАқпарат тілшісіне ТЖ департаментінен.