Батыс Қазақстанда 100-ге жуық тұрғын үйді су басты
БҚО ТЖ департаментінің жедел штабы мәлім еткеніндей, қардың күрт еріп, жауын-шашын түсуіне байланысты Жәнібек ауданында 2 сәуір күні сағат 23.00-ден бастап екі ауылға су кірді.
Жақсыбай ауылында 97 үй суға кетті. Жергілікті атқарушы органдар және шекара қызметі күшімен 637 адам эвакуацияланды. Соның 305-і (89-ы – балалар) М.Ықсанов атындағы мектеп-балабақша кешені ғимаратына, 332-сі (70-і – балалар) жақын-жуықтарының үйлеріне орналастырылды.
Сондай-ақ Талов ауылында 2 үйді су алып кетті. 8 адам (екеуі – балалар) туыстарын паналады.
ТЖ (5 қызметкер, 1 мотопомпа), жергілікті атқарушы органдар (142 адам, 11 техника), шекара қызметі (15 әскери қызметкер, 2 техника) оқиға орнында жұмыс істеуде.
Жақсыбай ауылының тұрғындары елді мекенді түгел су басып, қиын жағдайда қалғанын, мал шығыны бар екендігін хабарлап жатыр.
Қазіргі кезде оқиғаның жай-жапсары анықталу үстінде.
Еске сала кетейік, бұдан бұрын БҚО-ның Қызылтал ауылында 12 үйді су басқанын, тасыған су батыстағы тағы республикалық тас жолды шайып кеткенін, өңірдің тағы бір ауданында төтенше жағдай жарияланғанын жазған болатынбыз.