Батыс Қазақстан облысында су тасқынынан бұзылған 20 үйді жөндеу жұмыстары басталады

АСТАНА. ҚазАқпарат – Батыс Қазақстан облысында көктемгі су тасқынынан бұзылған 20 үйді жөндеу жұмыстары осы айда басталады. Бұл туралы Мәжіліс депутаттарының сауалына Премьер-Министрдің бірінші орынбасары Роман Склярдың жауабында айтылған, деп хабарлайды ҚазАқпарат тілшісі.

«Ақтөбе облысы Қобда ауданы Қобда ауылында тұрғын үйі апатты және тұруға жарамсыз деп танылған 30 отбасы анықталды. Жаңа 24 тұрғын үйдің (оның ішінде 18 бір пәтерлі және 6 екі пәтерлі) құрылысы басталды. Батыс Қазақстан облысында Бөрлі ауданындағы 20 бұзылған үй (Ақбұлақ ауылы – 7, Кеңтүбек ауылы – 5, Пугачево ауылы – 4, Қызылтал ауылы – 3, Аралтал ауылы – 1) бойынша келтірілген залалды бағалау аяқталды. Жөндеу-қалпына келтіру жұмыстарын осы жылдың мамырында бастау жоспарланып отыр», - деді Үкімет басшысының бірінші орынбасары жауабында.