Батыс Қазақстан облыстық халық шығармашылығы орталығының құрылғанына - 60 жыл
Қасиетті жеріміз халықтың мақтанышына ие болған тамаша әнші мен күйшіні, ақын мен сазгерді шығарды. Олардың қатарында қазақ саз мәдениетінің негізін қалаушы ұлы күйші Құрманғазы, Дина, Дәулеткерей, Сейтек, қайталанбас әншілік мектептің негізін қалаушы Мұхит және оның дәстүрін жалғастырушы Ғарифолла, сазгер Базарбай Жұманиязов, Ескендір Хасанғалиев және басқалары бар. Өңір мәдениетінің дамуы мен өркендеуіне зор үлес қосып, халқымыздың өнер қазынасын халыққа кеңінен насихаттап, ұлттық рухта жастарға тәрбие беріп, өнер жолына қанаттандырып отырған қара шаңырақ - Батыс Қазақстан облыстық халық шығармашылығы орталығының құрылғанына биыл 60 жыл толып отыр.
Орталық директоры Беркінғали Ғабделовтің айтуынша, облыстық мәдениет басқармасына қарасты орталық негізінен өңірдегі 12 аудандық мәдениет және тілдерді дамыту, дене шынықтыру мен спорт бөлімдерінің жұмысы мен 268 клубтық мекемелердің, соның ішінде 54 халықтық және үлгілі атағы бар ұжымдардың қызметіне бағыт-бағдар беріп, жан-жақты әдістемелік көмек көрсетеді. Сонымен қатар облыстық, республикалық, халықаралық байқаулар мен фестивальдерді, ақындар айтысын өткізіп, халық шығармашылығы жетістіктерін насихаттап отырады. Қазіргі таңда шығармашылық орталықтың базасында «халықтық» және «үлгілі» деген атақтары бар екі ұжым жұмыс жасайды. Оның бірі Норвегия, Румыния, Болгария және Түркия елдеріне дейін танымал болған «Ақжайық» би ансамблі болса, екіншісі - «Қызғалдақтар» балалар би ансамблі.
Облыстық халық шығармашылығы орталығы мемлекеттік тапсырыс бойынша жылына отызға тарта мерекелік іс-шара және клубтық семинар-кеңес, іс-тәжірибе өткізіп жүр. Олардың ішінде дәстүрлі түрде жыл сайын өткізілетін «Балдәурен», «Дала дарындары» атты балалар мен жастар шығармашылығы фестивальдері, өңіріміздің атақты сазгер лерінің, әнші-күйшілердің кештері бар.
Тәуелсіздігіміздің арқасында мәдениет саласының тарихын жаңаша парақтауға мүмкіндік туды. Соған орай өткенді еске алып, жаңғыртып, тарихымызда ізі қалған тұлғаларымыздың есімдерін, ұлағатты істерін болашақ ұрпаққа жеткізу бағытында ауқымды жұмыстар атқарылып келеді. Мәселен, Құрманғазы, Дина, Дәулеткерей, Қали, Мәмен, Оқап, Сейтек, Әбубәкір, Марабай сынды бабаларымыздың өнерлерін кеңінен насихаттау мақсатында республикалық байқаулар өтуде. Батырлығымен жауды тойтарған Махамбет пен тапқырлығымен дауды тоқтатқан Сырымдай дала кемеңгеріне арналып мәдени іс-шаралар оздырып жүр. Мұхит Мерәліұлы Ғарифолла Құрманғалиев сынды біртуар өнер иелерінің мерейтойларына орай республикалық әншілер байқаулары бірнеше рет өтіп, асылдарымыздың ізбасарлары табылды. Әнші-сазгер Ескендір Хасанғалиевтің әндерін орындаушылардың «Атамекен» халықаралық әншілер байқауы екі жыл сайын өткізіліп жүр, биыл алтыншы рет болмақшы. Сондай-ақ ақындық, азаматтық қасиеттерімен талайды тәнті еткен Жұбан, Қадыр, Тайыр сияқты ақберен ақындарымыздың артында қалған өшпес мұраларын насихаттау бағытында да ауыз толтырып айтарлықтай көп шара өтті.
«Дүниеде өнер көп, өнерді танып, қанаттандырушы шебер көп» дегендей, осы ауқымды жұмыстар өз дәрежесінде өткізіліп, мәдениеттің сан қырлы саласында үлкен жетістіктерге қол жеткізіп, сауықшыл халқымыздың ризашылығына бөленіп жүрген ұжымда елеулі еңбегімен танылған аға буын мәдени қызметкерлері баршылық. Олардың ішінде «Мәдениет қайраткері» төсбелгілерінің иелері Есенгелді Молдағалиев, Нұргүл Бердашева, Нәбира Саинова, Райхан Көжекешовалар бар. Ал көп жыл бойы осы салада қызмет жасап, қажырлы еңбегімен таныла білген Әміржан Тасболатов, Ару Нағымова, Бақыт Дәулетқалиева, Орынша Сапаровалардың жастарға берер үлгі-өнегесі мол. Осы аға буынның тәрбиесін алған, болашағынан үміт күттіретін жас мамандардың қатары жыл өткен сайын көбейіп келе жатқандығы да қуантады.
«Облыстық халық шығармашылығы орталығы ел арасынан шыққан дарынды жандардың қызықты әрі қиын өнер жолына нық қадам басуына, сөйтіп танымал әртіс, сахна саңлағы, елдің мақтанышына айналуына себепші болып жүр», деп түйді ойын Б.Ғабделов.