«Баспана» мен «Қазақстанның орнықтылық қоры» акционерлік қоғамдарын біріктіру процесі аяқталды
Бұл екінші деңгейдегі банктердің қаржылық тұрақтылығын қамтамасыз ету мақсатында қайталанатын функцияларды біріктіру үшін жүргізілді. Енді қолданыстағы және жоспарланып отырған мемлекеттік бағдарламалар бір оператор – «Қазақстанның орнықтылық қоры» АҚ-тың қызметіне шоғырландырылатын болады. Бұл біріккен ұйым жұмысының тиімділігі мен транспаренттілігін арттыруға және сол үшін бөлінетін ресурстарды оңтайландыруға мүмкіндік береді.
Қайта ұйымдастыру процесінен соң «ҚОҚ» АҚ-тың рейтингін Fitch Ratings халықаралық агенттігі BBB / «тұрақты» деп бағалады.
Біріккен компания таяу болашақта екінші деңгейдегі банктерді қаржылық қолдау арқылы банк секторының қаржылық тұрақтылығына жәрдем көрсету бойынша жұмысты жалғастыратын болады.
Сондай-ақ, Елбасы Нұрсұлтан Назарбаевтың «Президенттің бес әлеуметтік бастамасы» атты халыққа үндеуінде айтылған «Әрбір отбасына баспана алудың жаңа мүмкіндіктерін беру» бірінші бастамасының міндеттерін іске асыру шеңберінде әзірленген «7-20-25» мемлекеттік тұрғын үй бағдарламасын орындау бойынша да жұмыс жалғасын табады.