Баскетболдан Қытай чемпионатында ойнайтын тұңғыш қазақ - Шетелдегі қазақтілді БАҚ-қа шолу
Жауынгер Қойшанұлы баскетболдан Қытай чемпионатында өнер көрсетеді - Қытайдың «Орталық халық радиосы» (CNR)
Қытайда тұратын қандасымыз Жауынгер Қойшанұлы Қытайдың ерлер командалары арасындағы Ұлттық лига ойындарында (CBA) өнер көрсететін ойыншылардың бірі болып таңдалды, деп жазады Қытайлық kazakcnr.com сайты.
«21-ші тамыз күні Фуцзяньда 2020-2021-ші жылдардағы Қытайдың ерлер командалары арасындағы Ұлттық лигасы аясында (CBA) ойнайтын ойыншыларды таңдау жиналысында қазақ азаматы Жауынгер Қойшанұлы (бойы – 210 см., салмағы - 107 келі) «Нанкин тұңши дашың» клубына қабылданып, CBA- ға қатысуға жолдама алды. Осы жолғы ел чемпионатына қатысатын спортшыларды таңдауға жиналған мамандар тобына Қытайдың танымалы баскетбол шебері, Қытай баскетбол қауымдастығының төрағасы, елдегі ең дәулетті спортшылардың бірі Яо Мин төрағалық етті», - деп жазады CNR.
Ақпарат көзінің дерегінше, CBA лигасы - Қытай Халық Республикасындағы ең жоғары деңгейдегі баскетбол ойыны болып табылады. Ал қандасымыз Жауынгер Қойшанұлы - 1995-шы жылы Қытайдың Тарбағатай аймағының Толы ауданында туған. Жауынгер ауылына кездейсоқ келген жаттықтырушы спорт маманының көзіне түсіп, тек 18 жасынан бастап ғана кәсіби спортпен айналыса бастаған.
Түркия тарихындағы ең ірі табиғи газ қоры Қара теңізде табылды - TRT
Ыстанбұлдағы Долмабахче резиденциясында баспасөзге арнайы мәлімдеме жасаған президент Ердоған Түркия тарихындағы ең үлкен табиғи газ резервінің Қаратеңізде ашылғанын жариялады, - деп хабарлайды Түркия Радио Телевизия порталы. https://www.trt.net.tr/kazakh/turkiia/2020/08/21/turkiia-k-aratien-izdie-320-milliard-tiekshiemietr-molshierindie-tabig-i-ghaz-rieziervi-tapty-1477022
Өз мәлімдемесінде президент Ердоған: «Фатих» бұрғылау кемеміз, 2020 жылы 20 шілде күні бастаған Tuna-1 табиғи газ құдығын бұрғылау барысында, 320 миллиард текшеметр мөлшерінде табиғи газ қорын тапты. Бұл жұмыстар толығымен отандық мүмкіндіктермен жүзеге асты. Алдағы мақсатымыз - 2023-шы жылы Қара теңіз табиғи газын ұлтымыздың игілігіне ұсыну», - деп атап өткен.
Өтеген Естайұлы Моңғолияда үздік футболшылар қатарынан көрінді - KAZNEWS
Моңғолияның Футбол федерациясының жоғары лигасының сегізінші турында лигадағы мықты командаларды жеңіп келген Дэрэн клубы «Атлетик 220»-дан ұтылып қалды, деп хабарлайды Моңғолияның KAZNEWS ақпараттық порталы.
«Көшбасшылардың өзара бәсекелесінен өзге қызықты ойын «Ұланбатыр Мазаалайнууд» пен «Сумида-Жипро» клубтарының арасында өтті. Өйткені олардың қай қайсысы да маусымның алғашқы ойынында жеңіске жету мүмкіндігі зор болатын. «Ұланбатыр Мазаалайнууд» клубының сол қанаттағы жартылай қорғаушысы Өтеген Естайұлы «Сумида-Жипро» клубының қақпасына бірінші және матчтағы бірден-бір голды салып, 1:0 есебімен жеңіс туын желбіретті», - деп жазады KAZNEWS порталы.
https://kaznews.mn/utegen-yestai/
Тоқаев Қожа Ахмет Ясауи кесенесіне барды - «Фарс» ақпарат агенттігі
«Қазақстан Президенті Қасым-Жомарт Тоқаев Түркістан облысына жасаған сапарында 12 ғасырдың үлкен ақыны, сопы Қожа Ахмет Ясауи кесенесіне барды. Тоқаев күмбездің тарихи келбетін сақтай отырып жүргізілген жаңарту жұмыстарының нәтижелерімен танысты», - деп жазады Рarstoday.
https://parstoday.com/kz/news/kazakhstan-i47995
Нұр-Сұлтанға 30-шы тамызда арнайы ұшақ ұшады - KAZNEWS
Мемлекеттік төтенше комиссияның шешімі бойынша 2020 жылы 30 тамыз күні Қазақстан Республикасының астанасы Нұр-Сұлтан қаласына, 31 тамыз күні АҚШ-тың Сиатл қаласына Моңғолияның арнайы ұшағы ұшады. Бұл туралы Вице премьер-министрдің баспасөз қызметі хабарлап отыр, деп хабарлайды Моңғолиялық KAZNEWS ақпараттық порталы.
«Нұр-Сұлтан қаласына жасалатын рейс жолда Қырғыз Республикасының Бішкек қаласына аялдап, сол елде коронавирус инфекциясы салдарынан бөгеліп қалған Моңғолияның 30-ға жуық азаматын алып қайтады. Бұл рейстерде барлығы 520-ге жуық жолаушы тасымалданады. Осы айда барлығы 17 рейспен 4,240 азамат елге оралған», - деп жазады KAZNEWS порталы.
https://kaznews.mn/nursultanga-arnayi-ushaq-barady/
Самарқандта Түркия Республикасының Бас консулдығы ашылады - «ӨзА» ақпараттық агенттігі
Үкіметтің «Өзбекстан Республикасы мен Түркия Республикасы арасындағы стратегиялық серіктестікті одан әрі нығайту және жан-жақты ынтымақтастықты кеңейту жөніндегі шаралар туралы» қаулысы қабылданды, деп жазады Өзбекстанның «ӨзА» мемлекеттік ақпараттық агенттігі.
«Қаулыда Өзбек-Түрік қатынастарын сапалы жаңа деңгейге көтеру жөніндегі шаралар бағдарламасы мақұлданды және Түркиямен жан-жақты ынтымақтастықты кеңейту бойынша үйлестіру кеңесі құрылды. Үкімет қаулысында, Түркия үкіметінің техникалық көмегі түрлі бағыттарда кеңейтіліп, жетекші түрік сарапшылары тартылады. Сондай-ақ, 2020 жылдың соңына дейін Самарқандта Түркия Республикасының Бас консулдығын ашу көзделген», - деп атап өтеді «ӨзА» ақпараттық агенттігі.
https://uza.uz/kz/society/samar-andta-t-rkiya-respublikasyny-bas-konsuldy-y-ashylady-19-08-2020