Бәсекелестікті қорғау және дамыту агенттігі 193 газ құю станциясын тексеріп жатыр

НҰР-СҰЛТАН. ҚазАқпарат - Мемлекет басшысының ағымдағы жылғы 5 қаңтардағы тапсырмасы бойынша Бәсекелестікті қорғау және дамыту агенттігі 193 бөлшек автомобильге газ құю станциясына қатысты тергеп-тексеріп жатыр, оның 89-ы Бас прокуратурамен бірлесіп жүргізілуде. Бұл туралы ҚазАқпарат аталмыш ведомоствоның ресми сайтына сілтеме жасап хабарлайды.

Бас прокуратураның тексеруі шеңберінде Агенттік 44 нарық субъектісінің әрекеттерінде келісілген әрекет және картельдік сөз байласуды ұйымдастыру фактілерін анықтады.

Сондай-ақ қазіргі кезде прокуратура органдарының ұсыныстары негізінде Ақмола, Қызылорда және Қостанай облыстары мен Шымкент қаласы бойынша аумақтық монополияға қарсы департаменттер 32 нарық субъектісіне қатысты әкімшілік іс қозғады, материалдар сотқа жіберілді.

Солтүстік Қазақстан облысы мен Нұр-Сұлтан бойынша аумақтық монополияға қарсы департаменттер 7 нарық субъектісі бойынша материалдарды қылмыстық құқық бұзушылық белгілерін қарау үшін Экономикалық тергеу департаментіне жіберді.

Атырау облысында 2 нарық субъектісі бойынша таяу арада әкімшілік істер қозғалатын болады.

Сонымен қатар, прокуратура органдарынан қадағалау актілері келіп түскен жағдайда, басқа тергеп-тексерулер бойынша әкімшілік істер қозғалады.

Қалған нарық субъектілері бойынша бәсекелестікті қорғау саласындағы заңнаманы бұзушылық белгілерін анықтау бойынша жұмыс жалғасып жатыр.