Балқашта Дінмұхамед Қонаевқа ескерткіш орнатылды
2022 жылғы 14 мамыр 18:51

Балқашта Дінмұхамед Қонаевқа ескерткіш орнатылды

ТАЛДЫҚОРҒАН. ҚазАқпарат - Бүгін Алматы облысы Балқаш ауданының Бақанас ауылында мемлекет және қоғам қайраткері Дінмұхамед Қонаевтың ескерткіші ашылды, деп хабарлайды ҚазАқпарат тілшісі.

«Халқымыздың біртуар перзенті, мемлекет және қоғам қайраткері Дінмұхамед Ахметұлы Қонаевтың туғанына биыл 110 жыл. Мемлекет басшысы Қасым-Жомарт Кемелұлының Жарлығымен Қапшағай қаласына Қонаевтың есімі берілді. Бүгін, міне, қазақтың аяулы перзентіне зор құрмет көрсетіліп, еңселі ескерткіш орнатылды. Ірі тұлғалардың ерен еңбектерін үлгі етіп, ұлыларды ұлықтау – басты парызымыз. Дінмұхамед Қонаевтың бойындағы ұлтжандылық жастарға жұғысты болсын! Қазақтың дара тұлғасының ескерткіші құтты болсын!» – деген Қанат Бозымбаев ескерткіш авторлары мен халықаралық «Дінмұхамед Қонаев қорына» алғыс айтты.


Ескерткіш күрті гранитінен жасалған. Тұғырының биіктігі - 2 м, мүсінінің биіктігі - 3,30 м, тұтастай алғанда – 5,30 м. Мүсіннің авторы – Алтай Бейсенов, сәулетшісі – Бекзат Бейсенова. Ескерткіш демеушілер есебінен тұрғызылды.

Дінмұхамед Ахметұлының ұрпағы Эльдар Асқарұлы Қонаев бұл күнді - тарихи күн деп бағалады. Дінмұхамед Қонаев үшін ата-бабасының туған жері Бақанастың, ондағы жұртшылығының жөні мен жолы әрқашан ерекше болғанын атап өтіп, халықтың ниеті мен пейіліне әулеттері атынан ризашылық білдірді.


ҚР Парламенті Сенатының депутаты Бейбіт Исабаев халық ықыласы мен көңілінен шыққан тұлғаға деген құрметті ешкім де, ешқандай күшпен де тоқтата алмайтынын ерекше атап өтті.

Ал, генерал-лейтенант Амангелді Шабдарбаев «Бақанасқа Димаш Ахметұлының ескерткішін қою - Балқаш халқының арманы еді, ұзақ күткен арман бүгін орындалды», - деді.

Жиын соңында Дінмұхамед Қонаев рухына құран бағышталып, ас берілді.

Еске сала кетейік, жуырда Қапшағай қаласына Қонаевтың аты салтанатты түрде берілді.


Jańalyqtar

MURAǴAT