Баласын таспен ұрған әке ісі: Сотқа 6 куәгер қатысады

АЛМАТЫ. ҚазАқпарат - Алматыда баласын таспен ұрып талдырып кеткен әкенің ісі сотқа жетті, деп хабарлайды ҚазАқпарат тілшісі қалалық соттың баспасөз қызметіне сілтеме жасап. 

«ҚР ҚК 24-бабының 3-бөлімі бойынша, 99-бабының 2-бөлімі бойынша айыпталған Мұрат Асқароғлының ісі Алматы қаласының қылмыстық істер жөніндегі мамандандырылған ауданаралық сотына 19 желтоқсанда түсті. Қылмыстық іс 6 томнан тұрады. Іс 1 жәбірленуші мен 6 куәгердің қатысуымен қаралады», - деді сотының баспасөз қызметінен.

Айта кету керек, жантүршігерлік оқиға Алматыдағы шығыс айналма жолына жақын маңдағы Брянская көшесінде болған. 4 жасар бала қан жоса болған күйінше тал түбінен табылды. Кейін баланы туған әкесі ұрғаны анықталып, ол 2 айға қамалды.