Балаларын екпеге әкелетін аналар көбейді – алматылық педиатр

АЛМАТЫ. ҚазАқпарат - Алматыда балаларына екпе жасататын ата-аналар саны артып келеді. Бұл туралы педиатр маман онлайн-брифинг барысында айтты, деп хабарлайды ҚазАқпарат тілшісі.

№32 қалалық емхананың педиатрия бөлімінің меңгерушісі Әсел Елемесова балаларға тұмауға қарсы екпенің маңыздылығын айтты.

«Тұмау – жоғары тыныс жолдарының қабынуы. Тұмау кезінде адамның қорғаныш қабілеті төмендейді, ауру ары қарай бактериалды пневмонияға асқынып кетуі мүмкін. Вакцинация 6 айдан асқан балалардың барлығына жасалады. Ең алдымен, қауіп тобына жиі ауыратын балалар кіреді. 2019 жылмен салыстырғанда балаларына екпе алғысы келетін ата-аналар саны артып келеді», - деді Әсел Елемесова.

Биыл Алматыда 350 балаға тегін екпе жасалады. Қазір олардың 280-і екпе алып үлгерді.

Вакцинация алдында бала толық тексеруден өтеді. Егер қарсы көрсеткіштер болса балаға екпеге тыйым салынады.