Балалардың каникулы кезінде онлайн өтетін іс-шаралар жоспары әзірленді

НҰР-СҰЛТАН. ҚазАқпарат – Оқушылар 20 наурыздан бастап көктемгі каникулға шығады. Бұл туралы елорда әкімдігінің баспасөз орталығында өткен онлайн брифингте айтылды, деп хабарлайды ҚазАқпарат тілшісі.

«Біз үшін маңызды мәселенің бірі – оқушылардың 20 наурыздан бастап 31 наурызға дейін созылатын көктемгі каникулын өткізу. Каникул «Қазақстан балалары – көктемгі тамшы» ұранымен өтеді. Каникул кезінде оқушылардың пайдалы және белсенді қызметін ұйымдастыру үшін онлайн режимде өтетін іс-шаралар жоспары әзірленді», - дейді Нұр-Сұлтан қаласы білім басқармасы басшысының орынбасары Римма Имангазинова.

Ол ата-аналар мен оқушылардан карантин шараларын сақтауды өтінді.

«Алдымызда мейрам күндері мен каникул күтіп тұр. Оқушылардың жақсы демалып, төртінші тоқсанға ынта-жігермен келуіне тілектеспіз. Эпидемиологиялық жағдайға байланысты санитарлық норманы сақтауларыңызды сұраймыз», - дейді ол.