Балаларды қауіпті жұмысқа салған америкалық компания 1,5 млн доллар айыппұл төлейді

ВАШИНГТОН. ҚазАқпарат - АҚШ билігі елдің бірқатар штатында денсаулығына қауіп төндіретін жұмыс істеген 100-ден астам кәмелетке толмаған жасөспірімді анықтады, деп хабарлайды ҚазАқпараттың меншікті тілшісі NBC News арнасына сілтеме жасап.

Еңбек департаменті елдің ең ірі фирмаларының бірі Packers Sanitation Services Inc. компаниясының сегіз штатта түнгі уақытта 13 қасапхананы тазалап жүрген 13 жастағы 102 баланы анықтады. Компания азық-түліті санитарлық өңдеумен айналысады, оның бүкіл ел бойынша 700 нысанында 17 мың жұмысшысы бар.

Packers Sanitation Services Inc. АҚШ-тың әділ еңбек стандарттары туралы заңына сәйкес 1,5 млн доллар көлемінде айыппұл төледі. Ережеде еңбек заңнамасын бұза отырып жұмысқа қабылданған әрбір кәмелетке толмаған үшін 15 138 доллар өндіріп алу қарастырылған.

Еңбек департаменті түнгі ауысымда жұмыс істеген балалар өткір аралар мен жабдықтарды тазалау үшін қауіпті химиялық заттарды қолданғанын айтады.

Балалардың қорғаушылары зардап шеккендердің кейбіреулері АҚШ-тың оңтүстік шекарасын жақында кесіп өткен кәмелетке толмаған босқындар екенін атап өтті. Шекарада тексергеннен кейін олар Денсаулық сақтау және халыққа қызмет көрсету министрлігінің Босқындарды орналастыру басқармасына тапсырылды.

Ішкі қауіпсіздік департаментінің федералдық тергеушілері адам саудасының ықтималдығы бар-жоғын тексеру үшін тергеу жүргізуде.

Фото: Josh Funk/AP