«Бақытты отбасымен» несие алып беруге уәде берген алаяқ ұсталды
«24 жастағы жұмыссыз шығысқазақстандық тұрғын «Халық банк» АҚ клиенттерінің банк карталарынан 2 млн теңге жымқырды деген күдікпен ұсталды. 2018 жылдың басынан бері ол әлеуметтік желілерде (ВКонтакте, Инстаграм), «ОLX» онлайн-хабарландыру алаңында екінші деңгейлі банктерден, сондай-ақ, «Бақытты отбасы» ипотекалық бағдарламасы арқылы несие алуға көмектесетіні туралы хабарлама таратқан. Осыдан кейін әлеуметтік инженерияны пайдалана отырып, ол адамдардың реквизиттерін (шот нөмірі, банк карталарының нөмірі, анкеталық мәліметір, ЖСН, СМС-кодтар) пайдаланған», - делінген департаменттің хабарламасында.
Тергеу нұсқасына сәйкес, түскен қаражатты күдікті Нұр-Сұлтан, Алматы, Шымкент және Семей қалаларында қолма-қол шығарып отырған. Оның қазір 7 іске қатысы бары тергелуде. Көбінесе оның құрығына Қазақстанның оңтүстік өңірлерінің азаматтары ілінген.
Қазіргі уақытта күдіктінің үстінен ҚР ҚК-нің 190-бабы 2-бөлігі (алаяқтық) бойынша сотқа дейінгі тергеу амалдары жүргізіліп жатыр.