23:39, 10 Қаңтар 2022 | GMT +6
Бахрейн Қазақстандағы жағдайды тұрақтандыру үшін қабылданған шараларды қолдады
НҰР-СҰЛТАН. ҚазАқпарат – Бахрейн басшылығы қажет болған жағдайда Қазақстанға көмек көрсетуге дайын. Бұл туралы Қазақстан Республикасы Премьер-Министрінің орынбасары – Сыртқы істер министрінің м.а. Мұхтар Тілеуберді мен Бахрейн Корольдігінің Сыртқы істер министрі Абдуллатиф бен Рашид әл-Заянидің телефон арқылы әңгімесі барысында айтылды, деп хабарлайды ҚазАқпарат.
ҚР Сыртқы істер министрлігінен мәлім еткендей, телефон арқылы сұхбат Бахрейн тарапының бастамасымен өтті.
«Әңгіме барысында Абдуллатиф бен Рашид әл-Заяни Бахрейн басшылығы және халқы атынан Қазақстандағы жағдайды тұрақтандыру үшін қабылданған шараларды қолдайтынын атап өтіп, қажет болған жағдайда көмек көрсетуге дайындығын растады. Сондай-ақ, елде жуық арада тұрақтылық орнайтынына сенім білдірді», - делінген ҚР СІМ хабарламасында.
Өз кезегінде М.Тілеуберді Қазақстан басшылығы халықтың қауіпсіздігін қамтамасыз етуге және жағдайды қалпына келтіруге бағытталған іс-шараларды жүзеге асырып жатқанын хабарлады.
Тараптар сондай-ақ екіжақты және көпжақты ынтымақтастық мәселелерін талқылады.