Әзербайжан-Армения қатынасын дипломатиялық жолмен реттеуді жақтаймыз – Қасым-Жомарт Тоқаев

АСТАНА. ҚазАқпарат – Қазақстан Әзербайжан мен Армения арасындағы өзара қатынасты дипломатиялық жолмен реттеуді жақтайды. Бұл туралы Әзербайжан Президенті Ильхам Әлиевпен келіссөздерден кейінгі БАҚ өкілдеріне арналған брифингте Мемлекет басшысы Қасым-Жомарт Тоқаев айтты, деп хабарлайды ҚазАқпарат тілшісі.

«Бүгін халықаралық күнтәртібіндегі өзекті мәселелер бойынша пікір алмасу болды. Қазақстан мен Әзербайжан түрлі көпқырлы құрылымдар аясында жемісті өзара іс-қимыл жасайды. Халықаралық және өңірлік көптеген өзекті мәселелер бойынша ұқсас ұстанымды ұстанады. Осы тұрғы Қазақстан Әзербайжан мен Армения арасындағы өзара қарым-қатынасты дипломатиялық реттеуді дәстүрлі түрде жақтайды. Сонымен қатар бейбіт шартты тезірек жасасу бойынша күш-жігерге қолдау білдіреді», - деді Қасым-Жомарт Тоқаев.

Сондай-ақ Мемлекет басшысы Әзербайжанмен өңірдегі тұрақтылық пен қауіпсіздікті нығайту үшін өзара қолдау және бірлескен іс-шаралар қабылдауды жалғастыру қажеттігіне қатысты ортақ түсінік бар екендігін баса айтты.

«Қазақстан үшін Әзербайжанмен ынтымақтастық басымдық болды және бола да береді», - деді Президент.