«Азаматтық қоғаммен жұмыс - қызметіміздегі №1 басымдық» - «Samruk-Kazyna Trust» басшысы
2022 жылғы 29 наурыз 11:41

«Азаматтық қоғаммен жұмыс - қызметіміздегі №1 басымдық» - «Samruk-Kazyna Trust» басшысы

НҰР-СҰЛТАН. ҚазАқпарат - Мемлекет басшысы Қасым-Жомарт Тоқаев өзінің 16 наурыздағы жолдауында азаматтық қоғам институттарының рөлін нығайтуға ерекше назар аударды. Президенттің айтуынша, қоғамдық ұйымдардың қызметі - еліміздің тұрақты және жан-жақты дамуының маңызды факторы.

Елдегі коммерциялық емес ұйымдармен жұмысты көптеген жылдар бойы «Samruk-Kazyna Trust» қоры жүргізіп келеді. Қор миллиондаған қазақстандықтардың өмірін өзгерткен әлеуметтік бастамаларды іске асырды.


Жүйелік әдістер

«Қор жыл сайын мүмкіндігі шектеулі балаларды оңалтуға, олардың білім алуын ұйымдастыруға, бейімделген спортпен айналысу үшін мүмкіндіктер жасауға, тұрмысы төмен отбасылардан шыққан және ата-анасының қамқорлығынсыз қалған балаларды қолдауға, жасөспірімдер мен олардың ата-аналарына психологиялық көмек көрсетілуіне, ардагерлер мен тыл еңбеккерлерін қолдауға, өңірлердің спорттық инфрақұрылымын дамытуға және өзге де мақсаттарға бағытталған ондаған жобаларды іске асырады. Бұл жұмыс КЕҰ-мен бірлесіп жүргізіледі. Ұйымдар қоғамдық мәселелерді шешуге бағытталған түрлі бастамаларды ұсынады», - дейді Қордың бас директоры Альфия Адиева.

«Samruk-Kazyna Trust» жеке азаматтарға атаулы және біржолғы көмек көрсету практикасынан бас тартты. Оның орнына, Қор елдің барлық 17 өңірінде жүйелі жобаларды іске асыратын КЕҰ-ны қолдайды. Мысалы, отбасы көмек сұрап жүгінетін БЦП бар. Бір балаға көмектің орнына Қор елдің әртүрлі өңірлерінде оңалту орталықтарын құруға бағытталған әлеуметтік жобаға бастамашылық ететін КЕҰ-ны қолдайды. Нәтижесінде осындай диагнозы бар мыңдаған бала көмек алады.

Донорлық көмекке мұқтаждықтан арылу

«Азаматтық қоғаммен жұмыс істеу – «Samruk-Kazyna Trust» әлеуметтік жобаларды дамыту қорының жұмысындағы №1 басымдық». Бұл ретте өзара іс-қимыл КЕҰ-ны донорлық көмекке мұқтаждықтан арылту үшін жасалған. Айталық, біз ерекше балаларға арналған спорт секцияларын ашу жобасын іске асырып жатырмыз. Қор секцияларды ашуға көмектеседі, оларды қажетті спорттық жабдықтармен қамтамасыз етеді. Содан кейін жоба мемлекеттік қаржыландыруға көшеді, Қордың көмегі осымен тоқтатылады. Мысалы, Қор балалар медициналық мекемелерін жабдықтармен қамтамасыз етеді. Бірақ біз орталықтарды өз жобамыз ретінде жүргізбейміз, жергілікті ауруханалардың еншісіне береміз. Осылайша, біз жобалық менеджмент мәдениетін қалыптастырамыз, әрбір бастама – белгілі бір мерзімдермен белгіленген жоба», - деп түсіндіреді Альфия Адиева.

Ашықтық пен айқындықты арттыру

«Мемлекет басшысы өз жолдауында атап өткендей, азаматтық сектор қызметінің ашықтығы мен айқындығы маңызды. Биылдан бастап біздің Қор да осы бағыттағы өзгерістерге бастамашы болады. Жақында қызығушылық танытқандарға кері байланыс беру үшін call-орталық іске қосылды. Өңірлердегі әлеуметтік мәселелер бойынша сарапшылармен, белсенділермен, журналистермен және КЕҰ-мен үнемі кездесулер өткізіліп тұрады, Қор қызметі туралы есептер ұдайы жарияланып тұрады. Сондай-ақ, еліміздің барлық өңірлерінде жүзеге асырылып жатқан жобалар туралы хабардар ету үшін жаңа бөлімдер құрылатын сайттың жұмысында елеулі өзгерістер жоспарланып отыр», - деп атап өтті Қор басшысы.

Жобаларды Қормен бірлесіп іске асыратын КЕҰ ашықтығын ынталандыру үшін де көптеген жұмыстар қолға алынды. Олармен жасалған шарттарда өз қызметін бұқаралық ақпарат құралдарында, әлеуметтік желілерде жариялау, атқарылған жұмыс туралы есептілікті тұрақты тапсыру бойынша міндеттемелер қамтылады. Бұл - Қордың азаматтық секторды нығайту үшін іске асырып жатқан жұмысының аз ғана бөлігі. Қормен серіктестікте жұмыс істей отырып, КЕҰ білім алады, тәжірибе жинақтап, сараптама жасайды, қызметінің тиімділігі мен ашықтығын тұрақты түрде арттырады. Бұл жұмыс одан әрі жалғаса береді. Қордың жұмысы қоғамдық сұраныс пен азаматтардың пікірін негізге ала отырып жетілдірілетін болады.


Ұқсас жаңалықтар
Серіктестер жаңалықтары

Jańalyqtar

Үрдіс

MURAǴAT