Азаматтығы жоқ адамдар мен босқындар құқықтарын қорғау мәселелері талқыланды

None
АСТАНА. ҚазАқпарат – ҚР Парламенті Сенаты төрағасының орынбасары Асқар Шәкіров БҰҰ Босқындар істері жөніндегі Жоғарғы Комиссары басқармасының өкілі Ханс Шоддермен кездесті, деп хабарлайды ҚазАқпарат Палатаның баспасөз қызметіне сілтеме жасап.

Тараптар келіссөз барысында Қазақстан мен БЖКБ арасындағы босқындардың, пана іздеушілердің құқықтарын қорғау және азаматтығы жоқтықты одан әрі болдырмау жөніндегі ынтымақтастықтың ағымдағы мәселелерін және келешектегі өзара іс-қимыл бағыттарын талқылады.

«Қазақстанда азаматтығы жоқ адамдар санын азайту, босқындарды қорғау және гуманитарлық көмек көрсету жөнінде жұмыстар жүйелі түрде жүргізіледі. Біздің еліміз Босқындар мәселелері жөніндегі жаһандық форум аясында қабылдаған міндеттемелерді дәйекті түрде орындап келеді, ол БЖКБ басшылығы тарапынан басқа елдерге оң үлгі ретінде аталып өтті», - деді сенатор А. Шәкіров.

Ханс Шоддер ынтымақтастықтың қазіргі деңгейін жоғары бағалады және БҰҰ БЖКБ Қазақстан Республикасына жәрдемдесуді жалғастыра беруге дайын екенін білдірді. Ол азаматтығы жоқ адамдардың санын қысқарту жөніндегі еліміздің жетістіктерін атап өтіп, Қазақстан іс жүзінде осы саладағы халықаралық-құқықтық ережелер талаптарының 90%-ын іске асырып келе жатқанын жеткізді.

Кездесу қорытындысы бойынша Қазақстан мен БҰҰ БЖКБ босқындардың құқықтарын қорғау саласындағы ынтымақтастықты одан әрі нығайту туралы уағдаластыққа қол жеткізді.

Кездесуге Конституциялық заңнама, сот жүйесі және құқық қорғау органдары комитетінің төрағасы Владимир Волков та қатысты.


Фото: senate.parlam.kz




Соңғы жаңалықтар