Автожолдарға қатысты мәліметті толық қамтитын мобильді қосымша пайда болады
Қазақстанда құрылыс саласын e-Qurylys цифрлы жүйесі арқылы қарқындатып, жұмыс тиімділігін арттыру жоспарланып отыр. Министрдің орынбасары айтқандай, экожүйелер тәуекелдерді басқарудың бірыңғай платформасына жинақталып, бұл мемлекеттік басқарудың заманауи және тиімді жүйесін құрумен қатар, нақты деректер негізінде кешенді, уақтылы басқару шешімдерін қабылдауға мүмкіндік береді.
«Жылжымайтын мүлік нысандарын жобалау сатысынан бастап ғимаратты немесе белгілі бір құрылысты бұзуға дейін цифрландыру (сараптаманы, құрылысты және пайдалануды қоса алғанда) еліміздің аумақтық дамуын тиімді, сапалы, стратегиялық және бюджеттік жоспарлауды қамтамасыз етеді. Қазір қалалық құрылыс кадастры жүйесінде салынып біткен аумақтың инженерлік желілері туралы мәліметтердің 67,4% цифрландырылды, сондай-ақ цифрлы бас жоспардың үлесі – 95,2%. Ал, дәлме-дәл жоспарлау жобалары 91,7%-ға қамтылған. 2024 жылдың соңына қарай бұл көрсеткішті 100%-ға жеткізу жоспарланып отыр», - деді Д. Щеглова AMANAT партиясында өткен Экономика, кәсіпкерлік және аграрлық сектор мәселелері жөніндегі республикалық қоғамдық кеңес жанындағы Ақпараттық-коммуникациялық технологиялар комитетінің кезектен тыс отырысында.
Жауапты ведомствоның өкілі заманауи шешімдер арқылы дәлме-дәл жоспарлау жобаларының бекітілген бас жоспарына сай келмейтін 700-ден астам фактісі анықталғанын жеткізді. Бұл ретте жүйеде 2 мыңнан астам пайдаланушы жұмыс істейтінін айта кету керек.
Аталған e-Qurylys жүйесі биыл маусымда іске қосылды. Ол құрылыс процесінің барлық қатысушысына (тапсырыс беруші, мердігер, авторлық және техникалық қадағалау), сондай-ақ мемлекеттік органдарға өндірістік үдерісті автоматтандыруға септігін тигізіп отыр.
«Тың шешім арқылы республикалық 109 автожолдың құрылысы 100% жүргізіліп келеді. Сонымен қатар, аталған жүйеде 71 тұрғын үй нысаны тіркелген. Қазір мұнда 9 643 техникалық және авторлық қадағалау сарапшысы тартылып отыр. Жүйеге 27 869 пайдаланушы қосылған», - деді министрдің орынбасары.
Министрлік жол секторын цифрландыруды Жол активтерін басқару жүйесімен қамтып келеді. Оның мақсаты – ақауларды дер кезінде анықтап, жою арқылы автожолдарды жөндеуге жұмсалатын шығындарды оңтайландыру. Осылайша, күрделі шығындар азаяды деген болжам бар.
Биыл осы жүйенің көмегімен республикалық маңызы бар жолдардың барлық ұзындығының 67%-на (2023 жылдың соңына дейін 100%) жол жамылғысының ақауларына бағалау жүргізу жоспарланған.
Сонымен қатар, қарашаның соңына қарай жолдардың ашық картасының мобильді қосымшасы ашылады. Онда автожолдардың ахуалы, жол бойындағы қызмет көрсету нысандарының орналасқан жері, ақылы учаскелер туралы ақпарат орналастырылады. Сондай-ақ, ауа райы мәліметі жөнінде хабардар болуға мүмкіндік береді.