Ауыл әкімдігінің ғимараты өртенді

АСТАНА. ҚазАқпарат - Ақмола облысына қарасты Шойындыкөл ауылдық әкімдігінің ғимараты өртенді. Бұл туралы ҚР ІІМ Төтенше жағдайлар комитетінің ресми өкілі Нұрсұлтан Нұрахметов айтты, деп хабарлайды ҚазАқпарат.

Ресми өкілдің мәліметінше, 30 қараша күні таңғы сағат 04-54-те өртке қарсы қызмет кезекшілігіне Ақмола облысына қарасты Жарқайың ауданы Шойындыкөл ауылдық әкімдігінің ғимараты өртеніп жатыр деген ақпарат түскен. 120 шаршы метрлік тұрғын үйден әкімдікке айналған ғимараттың шатыры өртенген.

«Сағат 8-30-да өрттің алды алынып, 08-45-те толық өшірілді. Оқиға орнына ең жақын  140 шақырым жердегі Ақмола облыстық ТЖД өрт сөндіру қызметінің 6 маманы мен 2 техникасы барды. Сонымен қатар, өртті сөндіруге өртке қарсы ерікті жасақтың 6 маманы мен 2 техникасы да жұмылдырылды», - деді Нұрсұлтан Нұрахметов.

Алдын ала мәліметтерге қарағанда, өрт электр кабельдерінің қысқа тұйықталуынан болған. Оқиғадан қаза тапқандар мен зардап шеккендер жоқ.