20:25, 07 Маусым 2023 | GMT +6
Аустралияның оңтүстігінде 65 мың найзағай ойнап, аспанды жап-жарық етті
АДЕЛАИДА. ҚазАқпарат – Оңтүстік Аустралияда қатты дауылдан 10 мыңнан астам үй жарықсыз қалды. Метеорология бюросынан мәлім еткендей, 24 сағатта 65 мың найзағай жарқылы тіркелген, деп хабарлайды ҚазАқпарат ABC News-ке сілтемемен.
Аделаида оңтүстігінде Ноарлунгте жауын-шашын мөлшері 4 миллиметрден 25 мм дейін болған. Әуежай аумағына жарты сағаттың ішінде 20 мм дейін жауын-шашын жауған.
Нөсер жауын сейсенбі күні кешкісін және сәрсенбі таңертең жауған. Мемлекетттік төтенше жағдайлар қызметіне таңғы сағат 03:30-04:30 аралығында әр үш минут сайын қоңырау түскен, деп хабарлайды Xinhua.
Синоптиктердің хабарлауынша, жұма күні таңға дейін нөсер жауын жауып, найзағай ойнайды.
Мемлекеттік төтенше жағдайлар қызметінің мәлімдеуінше, қатты зақымдалу туралы ақпарат әзірге түспеген.
