Australian Open: Қос қазақстандық жасөспірім теннисші бақ сынайды

НҰР-СҰЛТАН. ҚазАқпарат – Аустралия ашық чемпионатының жасөспірімдер додасында алғаш рет қос қазақстандық теннисші өнер көрсетеді, деп хабарлайды ҚазАқпарат тілшісі.

Қазақстан теннис федерациясы мәлім еткендей, Аружан Сағындықова алғашқы айналымда жарыстың 8-ракеткасы, бельгиялық Софья Костуласпен шеберлік байқасады.

Тағы бір қазақстандық Максим Батютенко турнирді ұйымдастырушылардан арнайы шақырту алды. Теміртау қаласының түлегі бірінші кездесуінде ұлыбританиялық Мэттью Ранкинмен сынға түседі.

Бұл – олардың «Үлкен дулыға» турниріне алғашқы қатысулары.

Матчтар 23 қаңтар күні елорда уақытымен сағат 07.00-де басталады.

Еске сала кетейік, бұдан бұрын Анна Данилина жұптық сында үшінші айналымға шықты. Ал Александр Недовесов үшінші айналымға шыға алмады.