Australian Open: Елена Рыбакина әлемнің бірінші ракеткасымен ойнайды

АСТАНА. ҚазАқпарат - Елена Рыбакина Аустралия ашық чемпионатының төртінші айналымында әлемнің 1-ракеткасы, Польша өкілі Ига Швентекпен ойнайды, деп хабарлайды ҚазАқпарат тілшісі.

И.Швентек үшінші айналымда дүниежүзілік рейтингте 100-орында тұрған испаниялық Кристина Бушкэні 6:0, 6:1 есебімен ойсырата ұтты.

Бір сағатқа жуық уақытқа созылған матчта И.Швентек 3 эйс жасап, 10 брейк-пойнттың тең жартысын пайдалана білді. Қарсыласы бір ғана эйспен көзге түсті.

И.Швентек ширек финалға шығу үшін әлемнің 25-ракеткасы, қазақстандық Елена Рыбакинамен таласады.

И.Швентек пен Е.Рыбакина осыған дейін өзара екі рет кездескен еді. Есеп тең - 1:1.

Еске сала кетейік, бұдан бұрын Елена Рыбакинаның Аустралия ашық чемпионатының төртінші айналымына шыққанын жазған болатынбыз.

Фото: sports.kz