Ауғанстандағы стадионда қатарынан үш жарылыс болды

АСТАНА. ҚазАқпарат - Ауғанстанның шығысында орналасқан Нангархар провинциясының Джалалабад қаласындағы стадионда қатарынан үш рет жарылыс болып, кем дегенде сегіз адамның өмірін қиды. Бұл жайлы ақпаратты жергілікті ресми тұлғалар растады деп хабарлайды ҚазАқпарат.

TOLOnews-тің хабарлауынша, провинция губернаторы Аттаулла Ходжани жарылыстар стадионға крикет матчын тамашалауға көрермендер жиналған сәтте болғанын мәлімдеген.

Оның айтуынша, жарылыстардың салдарынан 45 адам жараланған.

Қаза тапқандар арасында турнирдің ұйымдастырушысы Хедаятулла Захир мен Лагман провинциясындағы Мехтарлам қаласы мэрінің орынбасары доктор Никмал да бар екені туралы хабар тараған.

Қасиетті Рамазан айының басталуына орай матчта жергілікті командалар ойнап жатқан.

«Талибан» қозғалысы Джалалабад қаласында болған осы жарылыстарға қатысы жоқ екенін айтып отыр.