Ауған тележүргізушілері әйел әріптестерін қолдап, эфирге маска тағып шықты
2022 жылғы 23 мамыр 15:32

Ауған тележүргізушілері әйел әріптестерін қолдап, эфирге маска тағып шықты

КАБУЛ. ҚазАқпарат – «Талибан» қозғалысы (Қазақстанда және бірқатар өзге мемлекетте тыйым салынған) теледидарда қызмет ететін әйелдерге бет-әлпетті жабуға міндеттейтін жарлық шығарғаннан кейін, Ауғанстанның TOLOnews телеарнасының жүргізуші ер адамдары әріптестеріне қолдау білдіріп, эфирге маска тағып шықты. ҚазАқпарат тілшісі бұл туралы ауған телеарнасына сілтеме жасап хабарлайды.

Ауғанстанда теледидар эфирінде әйелдерге хиджаб немесе никаб киюін міндеттейтін жарлық шықты. Оның қолданыс мерзімі 22 мамырдан басталды.

Жаңа ережелер барлық бұқаралық ақпарат құралдарына қолданылады.

Бұл ретте, TOLOnews телеарнасының мәлімдеуінше, «Ислам әмірлігі» басшылығының хиджаб кию туралы жарлығында теледидар бағдарламаларында жүргізуші әйелдердің беттерін жабуына қатысты нақты нұсқау жоқ.

«Бізге бұл шешімді белгіленген мерзімде орындау керек деп айтылды және бүгін біз оны орындадық. Бірақ біздің дәлелдеріміз екі жақты: біріншіден, «Ислам әмірлігі» басшылығының хиджаб кию туралы жақында шығарған жарлығында телебағдарламаларда жүргізуші әйелдердің бетін жабуы керек деген нақты нұсқау болған жоқ. Екіншіден, теледидардағы жүргізуші әйелдердің бейнелері виртуалды, әйелдердің түрлері нақты көрсетілмейді, сондықтан TOLOnews бұл мәселеде өз ұстанымын ұстанады», — деді телеарна директоры Хполвак Сапаи.


Ұқсас жаңалықтар
Ауғанстанда жарылыстан 8 адам қаза тапты
2022 жылғы 6 тамыз 10:27

Ауғанстанда жарылыстан 8 адам қаза тапты

НҰР-СҰЛТАН. ҚазАқпарат – Кабул қаласындағы жарылыс салдарынан сегіз адам қаза тауып, тағы 18 адам жарақат алды. Бұл туралы қалалық полицияның баспасөз хатшысы Халид Задран әлеуметтік желіде хабарлады, деп жазады ҚазАқпарат Синьхуа агенттігіне сілтеме жасап.

Халид Задранның айтуынша, жарылыс Кабулдың алтыншы полиция ауданында орын алған. Жарылғыш құрылғы қол арбасына орнатылған. Шабуылдың нысанасы — өтіп бара жатқан бейбіт адамдар. Сегіз адам қаза тауып, тағы 18 адам жарақат алды.

Әзірге болған оқиға үшін жауапкершілікті ешкім өз мойнына алған жоқ. Соңғы уақытта Ауғанстанда мектептер, мешіттер және автобустарда бірнеше жарылыс болып, қаза тапқандар мен жараланғандар саны көбейген. Бұл қылмыс үшін жауапкершілікті «Ислам мемлекеті» экстремистік тобы өз мойнына алды.


Фото: aa.com.tr





Елордада тағы бір саябақ пайда болады
2022 жылғы 5 тамыз 21:31

Елордада тағы бір саябақ пайда болады

НҰР-СҰЛТАН. ҚазАқпарат – Қырқүйекте өтетін Әлемдік және дәстүрлі діндер көшбасшыларының VII съезі аясында елордада жаңа саябақ ашылады. Бүгін оның тұжырымдамасын әзірлеу бойынша конкурс жарияланды. Бұл туралы форумның ресми өкілі Назым Жанғазинова өзінің Facebook парақшасында жазды, деп хабарлайды ҚазАқпарат тілшісі.

«Съезді өткізу аясында Қазақстандағы түрлі конфессиялар мен этностар арасындағы бірліктің, ынтымақтастық пен достықтың символы болатын табиғи-рекреациялық парк салынады. Саябақ ел астанасын абаттандыру мен көгалдандыру ісіне де ықпал етеді», - деп жазды Назым Жанғазинова.

Осыған байланысты съезд хатшылығы мен елорда әкімдігі еліміздің сәулетшілерін, ландшафт дизайнерлері мен урбанист мамандарын Есіл бойынан орын тебетін саябақ тұжырымдамасын әзірлеу конкурсына қатысуға шақырады. Эскиздік ұсыныстар 20 тамызға дейін қабылданады.

Айта кетсек, елордада 14-15 қыркүйек күндері Әлемдік және дәстүрлі діндер көшбасшыларының VII съезі өтеді. Мемлекет басшысы Қасым-Жомарт Тоқаевтың қабылдауында болған Парламент Сенатының төрағасы Мәулен Әшімбаев аталған шараға дайындық барысы жөнінде ақпарат берді.

Сондай-ақ, Президент Қасым-Жомарт Тоқаевтың шақыруымен Әлемдік және дәстүрлі діндер көшбасшыларының VII съезіне қатысу үшін Рим Папасы Франциск Қазақстанға мемлекеттік сапармен келеді.

ҚР Сыртқы істер министрлігі Рим Папасы Францисктің 13-15 қыркүйекке жоспарланған Қазақстанға мемлекеттік сапарының бағдарламасын жариялаған болатын.


Рим Папасының Қазақстанға мемлекеттік сапарының жоспары жарияланды
2022 жылғы 2 тамыз 16:31

Рим Папасының Қазақстанға мемлекеттік сапарының жоспары жарияланды

НҰР-СҰЛТАН. ҚазАқпарат – ҚР Сыртқы істер министрлігі Рим Папасы Францисктің 13-15 қыркүйекке жоспарланған Қазақстанға мемлекеттік сапарының бағдарламасын жария етті, деп хабарлайды ҚазАқпарат.


Сапардың бірінші күні Рим Папасының Қазақстан Президенті Қасым-Жомарт Тоқаевпен, сондай-ақ елімізде тіркелген шетелдік дипломатиялық корпус және азаматтық қоғам өкілдерімен кездесулері жоспарланған.

Рим-католик шіркеуінің басшысы сапарының екінші күнінде Әлемдік және дәстүрлі діндер лидерлерінің VII съезінің ашылуына және пленарлық отырысына, сондай-ақ кейбір басқа дін лидерлерімен бірқатар кездесулерге қатысады деп күтіләп отыр.

Сонымен қатар, 14 қыркүйекте Рим Папасы Франциск мыңдаған католик дінін ұстанушылар, оның ішінде Қазақстан астанасына арнайы келетіндері үшін дұға (месса) өткізеді.

Сапардың соңғы күнінде ол Әлемдік және дәстүрлі діндер лидерлерінің VII съезінің жабылуына және оның қорытынды декларациясының қабылдануына қатысуды, сондай-ақ Рим-католик шіркеуінің Қазақстандағы және көрші елдерден келетін дін қызметкерлерімен, монахтарымен және семинаристерімен кездесуді жоспарлап отыр.

Бұған дейін хабарланғанындай, Президент Қасым-Жомарт Тоқаевтың шақыруымен 13-15 қыркүйекте Рим Папасы Франциск Қазақстанға мемлекеттік сапармен келеді.

Рим Папасы Франциск – Қазақстан астанасында дәстүрлі түрде үш жыл сайын өтетін Әлемдік және дәстүрлі діндер лидерлерінің съезіне қатысуын растаған Рим-католик шіркеуінің бірінші басшысы.

Естеріңізге салсақ, Рим-католик шіркеуі басшысының, атап айтқанда Папа Иоанн Павел екіншінің Қазақстанға тұңғыш сапары 2001 жылғы 22-25 қыркүйек аралығында өткен.


Фото : gov.kz


Jańalyqtar

Үрдіс

MURAǴAT