Атыраулықтар сенбілікте 52 тонна қоқыс пен 4,3 тонна өлі балық жинады

АТЫРАУ. ҚазАқпарат - Атырауда өткен сенбілікте өзен жағалауынан 52 тонна қоқыс, 4,3 тонна өлі балық жиналды. Бұл туралы Өңірлік коммуникациялар орталығынан мәлім етті, деп хабарлайды ҚазАқпарат.

Экологиялық шараға 2600-ден астам қала мен селолық округтердің тұрғындары, мемлекеттік мекемелердің қызметкерлері, қоғамдық ұйымдардың өкілдері, студенттер қатысты.

«Сенбілікке қатысқандар қатары көп болды, 52 тонна қоқыс жиналды. Келесі жолы да барлық тұрғындарды осы бастаманы қолдауға, жағалауды тазартуға қатысуға шақырамыз», -деді Азаматтық орталықтың медиа бөлімінің меңгерушісі Сымбат Жандарбек.

Сонымен қатар, сенбілік қортындысы бойынша 4,3 тонна өлі балық жиналды, балықтардың салмағы есептеліп, қылмыстық іс материалына тіркелді.

2018 жылдың 10 желтоқсанынан бастап «Казгидромет» РМК Жайық өзеніндегі су жағдайына мониторинг жүргізіп келеді. Зертханалық сынамалар ластанудың жоғары деңгейін көрсетпеген. Қазір «Қазгидромет» мониторинг аясында штаттық режімде апта сайын сынама алып отыр. Су сынамасын Экология департаменті мен тұтынушылар құқығын қорғау департаменті де жүргізуде.

Бүгінге дейін 200-ден астам сынама алынды. Бұл өзеннің жағдайына мониторинг үшжақты жүргізіліп жатқанын және өзен жағдайы қалыпты екенін көрсетеді.

«Айта кету керек, қырылған балықтардың басым бөлігі (102,862 тонна) жасанды түрде өсірілген, яғни өзендегі бекіре тұқымдас балықтардың табиғи популяциясына қатысы жоқ. Жайықтағы балық қорының табиғи популяциясына жиналып алынған жалпы салмағы 11,3 тонна частик тұқымдас балықтар жатады. Сонымен қатар, ҚР Энергетика министрлігі Атырау облыстық әкімдігімен бірлесіп тұрақты түрде аймақтың экологиялық ахуалын жақсарту жөніндегі кешенді жоспарды дайындауда. Жағдайға мемлекеттік органдармен бірге «Nur Otan» партиясының облыстық филиалы, Атырау облыстық әкімдігі мониторинг жүргізіп отыр. «Nur Otan» партиясының филиалымен қатар ішкі істер органдарының қызметкерлері, ҚР Ауыл шаруашылығы министрлігі ветеринарлық қадағалау комитеті қызметкерлері сауда орындарындағы балық сататын нүктелерге күн сайын тексеру жұмыстарын жүргізеді. Атырау облыстық әкімдігі Жайық өзеніне ғылыми зерттеу жүргізуге 80 млн теңге бөлді», - делінген баспасөз хабарламасында.