18:55, 13 Қыркүйек 2018 | GMT +6
Атырауда жүк пойызы мен КамАз соқтығысты
АТЫРАУ. ҚазАқпарат - Атырау облысында жүк пойызы КамАзбен соқтығысты, деп хабарлайды ҚазАқпарат тілшісі.
«Оқиға 12 қыркүйек күні сағат 14.32-де Атырау облысы Исатай ауданына қарасты Аққыстау ауылында болған. Көліктер қорғалмайтын реттелмелі өтпе жолдың 251-ші шақырымында соқтығысты. Жүк пойызының құрамы Атырау-Астрахан бағытымен жол жүріп келе жатқан. Апаттың салдарынан КамАз автокөлігінің 49 жастағы жүргізушісі оқиға орнынан аудандық ауруханаға жатқызылды. 68 вагондық жүк пойызы сағат 15.10-да «Атырау» стансасынан аттанған алмастырушы қосалқы тепловозды күту үшін Аққыстау стансасына сүйреп жеткізілді. Басқа пойыздардың қозғалысы сол қалпы қалды», - деді Атырау облысы ТЖД-нің баспасөз қызметі.
Бүгін автомобиль жүргізушісі санитарлық авиацияның тікұшағымен Атырау облыстық ауруханасына жеткізілді.