Атырауда шағын несие беретін кеңсені тонаған күдікті ұсталды
Облыстық полиция департаменті баспасөз қызметінің ақпаратына қарағанда, Атырау қалалық полиция басқармасы жедел басқару орталығының «102» пультіне Вокзал маңы-5 шағын ауданындағы шағын несие беретін кеңсе тоналған.
«Медициналық маска киген ер адам касса қызметкерін пышақпен қорқытқан. Сөйтіп, касадағы ақшаны алып, оқиға орнынан бой тасалаған. Полиция күдіктіні 10 сағаттан соң ұстады. Күдікті бұрын сотталған, Жылыой ауданының орталығы – Құлсары қаласының 31 жастағы тұрғыны болып шықты. Тексеру кезінде күдіктінің іс-қимыл жоспарын алдын-ала ойластырғаны анықталды. Нысанның бейнебақылау жүйесі мен күзетшісі жоғын білген» -деп хабарлады департаменттің баспасөз қызметінен.
Қазір ұсталған күдіктіге қатысты Қылмыстық кодекстің 192-бабы 1-бөлігімен сотқа дейінгі тергеу жүргізіліп жатыр. Күдікті уақытша ұстау изоляторына қамалды.
Еске сала кетелік, бұдан бұрын Атырауда есірткіні насихаттайтын бірнеше сайтты жарнамалаған әйел ұсталған болатын.