Атырауда шағын бизнесті жүргізудің проблемалары айтылды
Атырау облыстық кәсіпкерлер мен жұмыс берушілер одағының атқарушы директоры Рафхат Бозбалиевтың айтуынша, Қазақстанда «Виртуалды қойма» модулінде электрондық түрде рәсімделетін тауарларға ілеспе жүк құжаттарын енгізудің пилоттық жобасы басталған.
«Бұл шара Еуразиялық экономикалық одақ шеңберінде тауарлар айналымының толассыз бақылануын қамтамасыз етуге тиіс. Мұндай жаңашылдық көп қабатты үй жанындағы дүкендер мен шағын маркеттер иелері тарапынан алаңдаушылық тудырып отыр. Сондықтан, кездесу мемлекеттік органдар мен бизнес өкілдері арасында өткізуді ұйғардық», -дейді Рафхат Бозбалиев.
Ал, кәсіпкерлердің пікіріне сүйенсек, бұл ең алдымен, шағын бизнес иелерін көптеген қиындыққа ұшыратады. Сондай-ақ азық-түлік бағасының қымбаттап, үй жанындағы дүкендердің жабылып қалуы мүмкін. Мәселен, шағын дүкеннің иесі Ләззат Досмағамбетованың айтуынша, азық-түлік сататын нүктелерде есеп жүргізетін ешкім жоқ. Өйткені, сатушыларға сауданы тәулігіне 16 сағат бойы жүргізуіне тура келеді. Ал, есеп жүргізу үшін басқа адамды жалдауға мүмкіндік жоқ.
«Виртуалды қойманы», электронды шот-фактураларды енгізсек, біз бұған үлгермейміз. Клиенттерге қызмет көрсетуге әрең үлгеретіндіктен, оларды 15 минуттан артық кешіктіре алмаймыз. Тіпті, біздің көпшілігімізде бұл салада арнайы білім де жоқ. Ал біздің шағын бизнесте 300 мың теңгеге есепші жалдау тіптен мүмкін емес», -дейді Ләззат Досмағамбетова.
Сондай-ақ, заңсыз алкоголь өнімдерін анықтау үшін «Wipon Pro» қосымшасы әзірленген. Оны сауда нүктелерінің иелері міндетті түрде орнатуы керек. Дүкен иелерінің айтуынша, бұл көп қаржы мен уақытты ысырап етеді.
«Біз бұл қосымша үшін жылына 8 мың теңге төлеуге тиіспіз. Бұл кейбір брендтерді анықтай алмайды. Сол себептен, сандарды қолмен енгізу керек. Сондықтан бұл бағдарламаның пайдасы жоқ», -деген пікірімен бөлісті кәсіпкерлер.
Шағын маркеттің иесі Азамат Маккенің айтуына қарағанда, тауарларды сатудан түскен табыстың 15%-ы коммуналдық қызметтер, банктік пайыздар, салықтар мен қызметкерлердің жалақы шығындарын толық өтемейді.
«Біз өзіміз орнатқан контейнерден қоқысты шығару үшін айына 60 мың теңге төлейміз. Оған қоса жарық, газ, су, үй-жайды жалға алу ақысын, салық пен қызметкерлердің жалақысын төлеу қажет. Банк картасымен немесе QR-кодпен төлем үшін банк бізден 3%-ға дейін қаржы ұстап қалады. Картадан ақша алу үшін тағы 1% қаржы ұсталады. Нәтижесінде айына 400 мың теңгені банктерге береміз. Енді «Виртуалды қойма» модулінде электронды түрде рәсімделген тауарларға ілеспе жүк құжаттарын енгізсе, бұл шағын бизнесті қиындыққа ұшыратады. Нәтижесінде азық-түлік бағасының өсуіне әсер етеді», -деп есептейді Азамат Макке.
Кездесуге қатысқан Атырау қалалық кәсіпкерлік бөлімінің, Мемлекеттік кірістер департаментінің өкілдері кәсіпкерлердің мәселелерін шешуге ықпал ететін ұсыныстарды тиісті орындарға жеткізуге уәде берді.