Атырауда салық төлеуден жалтарған серіктестік директоры жауапқа тартылды
Бұл қылмысты Атырау облысы бойынша мемлекеттік кірістер департаментінің экономикалық тергеу қызметі жедел-іздестіру шаралары кезінде анықтаған.
"Д. есімді азамат құрылтайшылардың шешімі бойынша ЖШС директоры болып тағайындалып, кәсіпкерлік қызметпен айналасқан. Оны жүзеге асыру барысында қылмыстық пиғылын қолданып, шот-фактураларды дайындап, жөнелтілген жүк құжаттарды өзінің қолымен және ЖШС-нің мөрімен куәландырған. Өз кезегінде, аталған азамат АҚ контрагенттіне жалпы сомасы 44 673 215 теңгені салық төлеуден жалтаруға көмек көрсеткен", - деп xабарлады Атырау облыстық МКД баспасөз қызметінен.
Айта кетелік, №2 Атырау қалалық сотының үкімімен айыпталушы Қылмыстық Кодекстің «Іс жүзінде жұмыстар орындалмай, қызметтер көрсетілмей, тауарлар тиеп-жөнелтілмей шот-фактура жазу бойынша әрекеттер жасау», «Ұйымдарға салынатын салықты және (немесе) бюджетке төленетiн басқа да мiндеттi төлемдердi төлеуден жалтару» баптары бойынша кінәлі деп танылды.
Сөйтіп, 1 жылға бас бостандығынан шектеу жазасы тағайындалып, коммерциялық ұйымдарға басшылық қызметімен айналысуға 1 жылға тыйым салынды.