Атырауда өндірістік қойманы тонаған ұрылар ұсталды
Үш адамнан құралған қылмыстық топ өндірістік қоймаға заңсыз кіріп, бағалы техникалық құрылғыларды ұрлаған. Бұл туралы 19 қаңтарда Атырау қаласындағы №1 полиция бөліміне шағым түскен.
«Аталған шағымға байланысты криминалдық полиция бөлімшесінің қызметкерлері жедел іздестіру жұмыстарын жүргізіп, 1985,1986 және 1988 жылғы күдіктілерді ұстады. Тексеру кезінде күдіктілердің дәл осындай 7 қылмысқа қатысы бары анықталды. Күдіктілер алдын ала сөз байласуы арқылы ірі мөлшерде, бірнеше рет өндірістік қоймаға ұрлыққа түскен. Жәбірленушіге жалпы соммасы 4 млн 540 мың теңге залал келтірген», -деп хабарлады облыстық полиция департаментінің баспасөз қызметі.
Қазір күдіктілерге қатысты ҚР Қылмыстық Кодексінің 188-бабының 3-бөлігімен (Ұрлық) қылмыстық іс тіркеліп, тергеп-тексеру жұмыстары жүріп жатыр.
Еске сала кетелік, бұдан бұрын Атырауда 70 көлік жүргізушісі 1 млн 743 мың теңгенің айыппұлын төлемегенін жазған едік.