Атырауда Құрбан айттың бірінші күні қой бағасы 120 мың теңгеге дейін көтерілді
Бүгін елімізде үш күндік Құрбан айт басталды. Атырауда құрбан малын шалуға ниет еткендер қатары көп. Алайда, мал бағасы шарықтап шыға келді.
Мәселен, Атырауда Ресейдің Астрахан облысымен шекараға дейін қатынайтын тасжолдың жанындағы мал базарында қой сатушылар да аз емес.
Базардың ішіне сыймаған сатушылар малын далада саудалап тұр. Олардың бағасы базар ішіндегіден арзандау екені байқалады.
Бұл базарға қой Батыс Қазақстан облысынан, Атыраудың Қызылқоға, Құрманғазы, Индер аударынан әкелінген.
Базардағы бағаға тоқталар болсақ, тұсақ үшін 60-65 мың теңге сұрайды.
Ерте туған қозылардың ең төменгі бағасы – 35 мың теңге. Мұнда бір қойды үш мың теңгеге сойып береді.
Ірі қараның бағасы 370 мың теңгеден басталады. Бұл – үш жасар өгіздің бағасы. Ал, ұрғашы сиырдың ең арзаны – 400 мың теңге.
«Өзім баққан өгізді сатуға әкелдім. Шамамен 350 келі тартатынына сенімдімін. Салмағына, қоңына байланысты 700 мың теңгеге сатамын. Бұдан төмен бағаға бере алмаймын», -дейді Индер ауданынан келген ер адам.
Атыраулық мал алу үшін көп баратын базардың бірі «Тума» деп аталады. Қаланың орталығында орналасқан бұл сауда орнындағы баға өзгелерінен қымбаттау көрінеді.
Мұнда қозыны 40 мың теңгеге сатып алуға болады. Ірі қой 100 мың теңге бағаланып тұр.
Ал, семіз ісек үшін 120 мың теңге сұрайды. Бұл базарда әр қойды сою бағасы – төрт мың теңге.
«Жыл сайын Құрбан айт жақындағанда мал бағасы шарықтап шыға келеді. Сауап жинайтын күндері мұны реттейтін тетік жоқ па? Бір ісекті 120 мың теңгеге сатып алу мүмкін емес», -дейді қала тұрғыны Нұрлан Тәжіғалиұлы.
Еске сала кетелік, бұдан бұрын Атырауда Құрбан айт кезінде мал сою пункттерінің жұмысын қадалағау күшейтілетінін хабарлаған едік.