Атырауда коронавирус жұқтырған 24 науқас жансақтау бөлімінде жатыр

АТЫРАУ. ҚазАқпарат – Атырауда инфекциялық стационардың жансақтау бөлімінде 24 науқас жатыр, деп хабарлайды ҚазАқпарат.

Облыстық денсаулық сақтау басқармасы басшысының орынбасары Қайсар Абдалиевтың мәліметінше, Атырауда соңғы үш күнде коронавирус инфекциясын жұқтырғандар саны 35,9%-ға өскен.

Мәселен, 28 маусымда қауіпті вирусты 66 адам жұқтырған. Ал, кеше, 1 шілдеде 103 жағдай анықталған.

«Қазір өңірде 2 098 төсектік 10 инфекциялық стационар дайындалды. Оның ішінде Атырау қаласында 460 төсек-орны бар 3 стационар, Теңіз кен орнында 1 360 төсек-орындық стационар, 7 ауданда 278 төсек-орынға арналған стационар жұмыс істейді. Ал, реанимациялық төсек-орын саны – 81. Бұған қоса, 750 төсек-орындық қосымша резервтік инфекциялық стационар дайын тұр» -дейді Қайсар Абдалиев.

Оның айтуынша, облыстағы инфекциялық стационарларда 437 пациент ем алып жатыр. Стационарлардағы төсек-орын жүктемесі 20,8% -ды құрап отыр.

«Модульдік аурухана науқастарға 90%-ға толды. Жансақтау бөлімінде 24 пациент жатыр. Оның 20-сының жағдайы ауыр халде. Жағдайы өте ауыр 4 науқас өкпені жасанды желдету аппаратына қосылған» - деді Қайсар Абдалиев.

Еске сала кетелік, бұған дейін Атырауда коронавирус жұқтырған 385 адам оқшауланғанын жазған болатынбыз.