Атырауда көктайғақ: екі көлік соқтығысып, бір жолаушы ауруханаға түсті
2021 жылғы 16 қараша 14:59

Атырауда көктайғақ: екі көлік соқтығысып, бір жолаушы ауруханаға түсті

АТЫРАУ. ҚазАқпарат – Атырау облысында көктайғақтың салдарынан екі көлік соқтығысып, бір жолаушы ауруханаға түсті, деп хабарлайды ҚазАқпарат.

Облыстық полиция департаменті баспасөз қызметінің ақпаратына қарағанда, жол-көлік оқиғасы 16 қарашада сағат 11:00 шамасында болған.

«Бүгін «Атырау-Доссор» бағытындағы тас жолдың бойында орналасқан дәмхана тұсында «Toyota Hilux» көлігінің жүргізушісі көктайғақта рульге ие бола алмай қалған. Соның

салдарынан жол жиегінде тұрған «Lada Priora» автокөлігіне соқтығысқан. Жол-көлік апатының салдарынан «Lada Priora» көлігінiң жолаушысы жарақат алды. Жарақаттанған

жолаушы Атырау облыстық ауруханасына жедел жеткізілді» -деп хабарлады департаменттің баспасөз қызметі.

Облыстық полиция департаменті ауа-райының күрт өзгеріп, температураның төмендеуіне байланысты жүргізушілерге ескерту беріп отыр.

«Күзгі-қысқы кезеңнің басталуымен ауа-райының, яғни метеорологиялық жағдайдың өзгеруі көлік жүргізуге әлдеқайда қауіпті болады. Жылдың осы мезгілінде өте мұқият болу керек екенін ескерткіміз келеді. Жылдамдық режимін, сондай-ақ, автомобильдер арасындағы қауіпсіз арақашықтықты сақтау, қысқы дөңгелектермен жабдықтау жолдағы

күтпеген апаттың алдын алуға бірден-бір себепші болады» -делінген ескертуде.

Қазір жол-көлік оқиғасына байланысты тексеру жүріп жатыр.

Еске сала кетелік, бұған дейін Атырауда Ресейде тіркелген көлік жүргізушісі адам қағып,

мерт қылғанын жазған болатынбыз.


Автор:
Тілші

Jańalyqtar

MURAǴAT