Атырауда 3 күнге созылған халықаралық оркестрлер фестивалі аяқталды

АТЫРАУ. ҚазАқпарат - 22 қазанда басталған фестивальдің гала-концертін 2000-ға жуық қала тұрғындары мен қонақтары тамашалады, деп хабарлайды ҚазАқпараи өңірлік коммуникациялар қызметіне сілтеме жасап.

Шараға Қырғызстан, Өзбекстан және Ресей мен қатар, еліміздің өзге де облыстарының 600-ден аса өнер иелерінен құралған 15 оркестр қатысты. 

Үш күнге созылған халықаралық фестиваль «Рухани жаңғыру» бағдарламасы аясында өтті. Гала-концертке қазақ музыка өнерінің xас дүлдүлдері Асанәлі Әшімов, Ұлықбек Есдәулет, Қатимолла Бердіғалиев,  Айтқали Жайымов, Айгүл Үлкенбаевалар қатысты. Облыс әкімі Нұрлан Ноғаев барлық қонақтарға алғысын білдірді.

«Атырау аспанын, Ақжайықтың жағасын күймен күмбірлеткен Құрманғазы бабамыздың атындағы xалықаралық оркестрлер фестивальіне келген барлық қонақтарға атыраулықтар атынан ризашылығымды білдіремін. Елбасы өзінің бағдарламалық мақаласында «Әркім өзінің туған жерін, өлкесін жетік білуі керек. Туған жерден елге деген маxаббат оянады, елге қызмет ету намысы оянады» деген болатын. Әр үйдің төрінде тұратын домбыраның арқасында еліміздің өнері, дәстүрі, мәдениеті бүгінге жетіп отыр. Өнеріміз берік кезде мәдениетімізді, дәстүрімізді тани біліп, дәріптеп, әлемдік жаһандану заманындағы жастарымыздың бойына руx сіңіреміз. Елін, жерін қорғайтын адал азаматты өсіруде сіздердің атқарып жүрген еңбектеріңіз зор. Өз өнерлеріңізге адалдық танытып келесіздер, қатарларыңыз көбейсін. Біз өзімізге жүктелген лауазымдық міндетке сәйкес осындай шараларды ұйымдастырамыз. Сонымен қатар, әр адам өзінің азаматтық ұстанымына сәйкес бұл істердің қосшысы, жаршысы болуы ләзім»,-деді облыс әкімі.

Шараның басты мақсаты - ұлы күйші және композитор Құрманғазы Сағырбайұлының рухын насихаттау. Атырау облысы әкімінің тапсырмасымен облыстық мәдениет, мұрағаттар және құжаттама басқармасы ұйымдастырған айтулы шара көптің көңілінен шықты. 

«Барлығы жоғарғы деңгейде өтті. Біз қалаға келгеннен бастап күтіп алып, жақсы ұйымдастырып қойған. Фестивальдің өту барысы да ұтымды қарастырылған, бір-біріне достығы мен жарасымы сақталған мемлекеттерді жинаған. Алғаш рет ұлттық халықаралық фестивальге қатысып отырғанымыздың өзі - біз үшін үлкен мәртебе. Қазақ аспаптарының өзіндік ерекше үні бар. Домбыраны тыңдағанда ерекше күйде боласың. Алайда, тек аспаптар мен тембрімізде өзгешелік болмаса, музыкада жанымыз бір»,- дейді Ресейдің халық әртісі Александр Мостыканов.

Шара соңында облыс әкімі елімізге танымал белгілі дирижерлерді «Фестиваль лауреаты» атағымен марапаттады.