Атырауда 3 адамның өліміне себепкер болған автобус жүргізушісі сотталды
Резонанс туғызған атышулы жол апаты ақпан айында «Атырау – Орал» тасжолында болған. 54 жастағы жүргізуші тізгіндеген маршрутты автобус жүк көлігімен соқтығысқан. Оқиға орнында үш адам мерт болды, 20-ға жуық адам жарақат алды. Оның ішінде жарысқа бара жатқан кішкентай балалар да бар болатын
«Сот отырысы кезінде жүргізушінің кінәсі толығымен дәлелденді. Сотталушы ұсынылған айғақ-дәлелдермен келісе отырып, өз кінәсін мойындады. Ол жәбірленуші тараптан кешірім сұрап, бас бостандығынан айырмауды өтінді. Сотталушының шын ниетпен өкінуі, тұрғылықты жерінен берілген жағымды мінездеме, әйелінің ауыр науқасқа шалдығуы мен бұрын сотталмағаны – осының бәрін сот қылмыстық жауапкершілікті жұмсартатын жағдай ретінде ескерді», - деп атап өтті облыстық соттың баспасөз қызметінен.
Сот үкімімен айыпкердің бас бостандығы 6 жылға шектелді. Сонымен қатар, ол көлік жүргізу құқығынан бес жылға айырылды.