Атырауда 24 жастағы жігіт біреудің көлігін айдап кеткен
Облыстық полиция департаменті баспасөз қызметінің мәліметіне сүйенсек, көлік кеше, 4 қарашада Атырау қаласында ұрланған.
«Бұл туралы сағат 12:22 шамасында «Тoyota Highlander» маркалы көліктің иесі – 28 жастағы азаматшадан 102 операторы арқылы шағым түсті. Ол сол күні сағат 11:20 шамасында Б.Момышұлы көшесінде орналасқан емхананың алдына қара түсті «Toyota Highlander» маркалы автокөлігін қалдырған. Бірақ, кейін емханадан шыққан кезде көлігін таба алмай қалған. Шағымданушының хабарынан кейін жедел басқару орталығы мен патрульдік полиция қызметкерлері жедел іздестіруге кірісті. Жедел басқару орталығының қызметкерлері «Сергек» жүйесінің бейнебақылау камералары арқылы ұрланған автокөліктің жүру бағыты анықтады. Ал, полиция қызметкерлері көлікті Ш.Уәлиханов көшесінің бойында тоқтатып, оны заңсыз жүргізіп кеткен 24 жастағы ер адамды ұстады» -деп хабарлады департаменттің баспасөз қызметі.
Кейін белгілі болғандай, иесі көліктің кілтін оталдыру тетігінде қалдырып, есігін құлыптамаған. Қазір бөтеннің көлігін ұрлап, айдап кеткен күдіктіге қатысты ҚР Қылмыстық кодексінің 200-бабының 1-бөлігімен (Автокөлікті заңсыз айдап кету) қылмыстық іс қозғалды. Сотқа дейінгі тергеу басталды.
Еске сала кетелік, бұдан бұрын Атырауда ұрланған көлік 15 минутта иесіне қайтарылғанын жазған едік.