Атырауда 18 жастағы жүргізушіден мылтыққа ұқсас қолдан жасалған қару тәркіленді
2022 жылғы 16 қаңтар 14:55

Атырауда 18 жастағы жүргізушіден мылтыққа ұқсас қолдан жасалған қару тәркіленді

АТЫРАУ. ҚазАқпарат – Атырауда 18 жастағы жүргізушіден мылтыққа ұқсас қолдан жасалған қару тәркіленді, деп хабарлайды ҚазАқпарат.

Облыстық полиция департаменті баспасөз қызметінің мәліметінше, жүргізушінің көлігі кеше, 15 қаңтарда түнгі сағат 1:30 шамасында тоқтатылған.

«Қазір Атырау қаласында патрульдік полиция мен криминалдық полиция бөлімінің қызметкерлері бірлескен жұмыс жүргізіп жатыр. Мәселен, 15 қаңтарда «Батыс–13» экипажы және криминалдық полиция бөлімінің қызметкерлері «ВАЗ – 2109» маркалы автокөлігін тоқтатқан. Көлікті 2003 жылғы бозбала басқарғаны анықталды. Тексеру кезінде автокөліктің жүк салғышынан мылтық қаруына ұқсас қолдан жасалған зат табылып, айғақ зат тәркіленді», -деп хабарлады департаменттің баспасөз қызметі.

Аталған бозбала Атырау облысында жарияланған төтенше жағдай режимін бұзғандығы үшін ҚР Әкімшілік құқықбұзушылық туралы кодексінің 476-бабымен әкімшілік жауапқа тартылды. Енді оның жаппай тәртіпсіздікке қатысының бар-жоғы тексеріліп жатыр.

Еске сала кетелік, бұдан бұрын Атырауда жаппай тәртіпсіздікке қатысқан күдіктіден атыс қаруы тәркіленгенін жазған едік.


Автор:
Тілші

Jańalyqtar

MURAǴAT