Атырау облысының екі ауылында қауын шыбынының таралуына байланысты карантин енгізілмек

АТЫРАУ. ҚазАқпарат – Атырау облысының екі ауылдық округінде карантин режимін енгізу жоспарланып отыр, деп хабарлайды ҚазАқпарат тілшісі.

«Карантин Жылыой ауданының Қосшағыл ауылдық округінде қауын шыбынының таралуы себебімен енгізілуде. Зақымданған аумақтың ауданы – бір гектар. Махамбет ауданының Бақсай ауылдық округінде карантинге оңтүстікамерикалық қызанақ күйе көбелегінің көбеюі себеп болған. Зақымданған аумақ – екі гектар жер», - делінген Атырау облысы әкімдігінің «Ашық ҮЕҰ» порталында жарияланған қаулыда.

Карантин режимін енгізу карантин нысандарының таралуына жол бермеу, оларды уақытылы анықтау, карантин нысандарының таралу ошақтарын оқшаулау және жою мақсатымен енгізіліп жатыр.

Қаулы көпшіліктің талдауында биылғы жылдың 30 наурызына дейін болады.