Атырау облысының аудандық сотының атынан жалған парақша ашылды
«Белгісіз біреу Исатай аудандық сотының іс-қағаз жүргізу меңгерушісі Ләйла Хайруллина атынан ғаламторда ағылшынша жалған парақша ашқан. Ол қазақша шындыққа сай емес ақпараттар таратып, Жоғарғы Соттың төрағасы, Бас прокурор, соттардың жұмыстарына қатысты түсініктеме беріп сот жүйесінің беделіне нұқсан келтірген. Парақша анықталғаннан кейін бұл жайында Атырау облысы бойынша ҰҚК департаментіне хабарланды.
Исатай аудандық ІІБ тергеушісінің қаулысы бойынша ҚР ҚК 274 бабының 2 тармақшасымен «бұқаралық ақпарат құралын пайдалана отырып қоғамдық тәртіпті бұзу қаупін төндіретін көрінеу жалған ақпарат тарату» бойынша қылмыстық іс қозғалды», - деп хабарлады Атырау облыстық соттар әкімшілігінің жетекшісі Гүлжан Жұмағалиева.
Қазір тергеу жүргізілуде. Алайда жалған парақша әзірге бұғатталмаған. Л. Хайруллина жеке парақша ашып онда өз атынан ағылшынша ашылған парақшаның жалған екендігін мәлімдеді.