Атырау облысында полипропилен өндіретін кешен салынып жатыр
«Атырау мұнай өңдеу зауытында 2018 жылдан бастап хош иісті көмірсутектер (бензол, параксилолды) өндірісі басталды. Биыл бензол мен параксилол өндіру көлемі 125 мың тоннадан асады. Сонымен қатар, осы жылы тамыз айында Алматы облысында жағармай шығаратын зауыт пайдалануға берілді. Оның қуаты - жылына 100 мың тонна. Осы өндіріс ішкі нарықтың жағармайға деген қажеттігін жабуға және жақын шетелге оны экспорттауға мүмкіндік береді», - деді Әсет Мағауов ОКҚ-да өткен баспасөз мәслихатында.
Вице-министрдің айтуынша, саланы дамытуға инвестиция тарту үшін Атырау облысындағы Арнайы мұнай-газ химия аймағына мемлекеттік қолдау көрсетілуде.
«Арнайы мұнай-газхимия аймағында қуаты 500 мың тонналық полипропилен өндіретін кешен салынып жатыр. Полипропилен жобасы бойынша құрылыс-монтаждау жұмыстары 44 пайыз орындалды. Теміржол инфрақұрылымы, іргетас салу жұмыстары толық аяқталды. Бүкіл жабдыққа тапсырыс беріліп, олар жартылай жеткізілді. Құрылыс алаңында шамамен 1 700 қазақстандық азамат жұмыс істейді. Жоба 2021 жылы аяқталады», - деді ол.