Атырау облысында мәслихат депутаттығына таласатын үміткерлердің 21 пайызы - әйелдер
Атырау облыстық аумақтық сайлау комиссиясының мәліметінше, мәслихаттың бір мандаттық 125 округіне 408 кандидат ұсынылған.
Оның ішінде 383 кандидат тіркелген.
«Облыстық мәслихат депутаттарын сайлауға 6 партия ұсынған тізіммен 66 кандидат тіркеліп отыр. Барлық деңгейдегі мәслихат депутаттарын сайлау жөніндегі бір мандаттық 125 аумақтық сайлау округіне 408 кандидат ұсынып, оның 383-і (93,87%) тіркеуден өтті. Ұсынылған 408 кандидаттың 13-і жеке өтініші негізінде тіркеуден алынып тасталды. Ал 12 кандидатқа бүкіл құжаттарды ұсынбауына байланысты тіркеуден бас тартылды», -деп хабарлады аумақтық сайлау комиссиясынан.
Орташа алғанда бір мандатқа 3 кандидаттан келеді. Тіркелген кандидаттардың арасында 300 (78,3%) ер, 83 (21,7%) әйел бар.
«Биылғы 19 наурызда өтетін Мәжіліс және мәслихат сайлауында Атырау облысындағы 9 мәслихатқа 140 депутат сайлануы керек. Оның ішінде 30-ы облыстық мәслихатқа, 25-і қалалық мәслихатқа, 85-і аудандық мәслихат депутаты атанады. Облыстық мәслихатқа 30 депутаттың 15-і (50%) партия тізімі бойынша сайланады», -деп мәлім етті аумақтық сайлау комиссиясынан.
Еске сала кетелік, бұдан бұрын Атырау облысында Мәжіліс депутаттығына 13 кандидат таласатынын хабарлаған едік.
Парламент Мәжілісінің депутатын сайлау бойынша №13 бірмандатты аумақтық сайлау округіне ұсынылған 20 кандидаттың 13-і немесе 65% тіркелген.
Оның 10-ы (77%) өзін-өзі ұсынса, үш партия ұсынған 3 (23%) кандидат тіркеліп отыр. Кандидаттардың арасында жетеуі (53,84%) ер адам, алтауы (46,16%) әйел.
Бір кандидаттың заң талаптарына сәйкес келмегені анықталды. Оның өтелмеген немесе алынбаған соттылығы бар.
Сондай-ақ сайлау комиссиясына көзделген барлық құжатты ұсынбауына байланысты 6 кандидатты тіркеуден бас тартылған.