Атырау облысында коронавирусқа шалдыққандар саны күрт көбейді
2022 жылғы 11 қаңтар 15:17

Атырау облысында коронавирусқа шалдыққандар саны күрт көбейді

АТЫРАУ. ҚазАқпарат – Кешеден бері «сары» аймаққа өткен Атырау облысында коронавирус инфекциясына шалдыққандар саны күрт көбейді, деп хабарлайды ҚазАқпарат.

Облыстық денсаулық сақтау басқармасының баспасөз қызметінен мәлім еткендей, биылғы 3 қаңтардан бері қауіпті вирусты жұқтырушылар қатары көбейіп отыр.

Мәселен, 3 қаңтарда – 20, 6 қаңтарда – 22, 8 қаңтарда – 33, 9 қаңтарда 42 адамнан коронавирус инфекциясының белгісі табылған. Ал, өткен тәулік – 10 қаңтарда 97 адамның Covid-19 инфекциясын жұқтырғаны анықталып отыр.

«Соңғы тәуліктерде өңірде коронавирус инфекциясымен сырқаттанушылықтың өскені

байқалады. Тек 10 қаңтарда 97 науқас анықталды. Әсіресе, Атырау қаласында бір күнде Covid-19 инфекциясын жұқтырудың 80 жағдайы расталды. Қауіпті вирус Жылыой ауданындағы Теңіз кен орнында – 6, Индер ауданында – 5, Құрманғазы ауданында 6 адам жұқтырды. Коронавирус инфекциясының симптомды белгісі 52 науқаста байқалса, 45 адамда індет белгісі жоқ», -деп мәлім етті басқарманың баспасөз қызметінен.

Өткен тәулікте коронавирустан 7 адам сауығып шыққан. Қазір 128 адам үй жағдайында емделу үшін оқшауланған. Ал, модульдік ауруханада – 124, аудандардағы инфекциялық стационарларда – 14, Теңіз кен орнындағы инфекциялық стационарда 93 науқас арнайы хаттамаға сәйкес ем-дом қабылдап жатыр.

Еске сала кетелік, бұған дейін Атырау облысында бір тәулікте 18 адам коронавирус

жұқтырғанын хабарлаған едік.


Автор:
Тілші

Jańalyqtar

MURAǴAT