Атырау облысына 2 мың тонна ұн жеткізіледі
2022 жылғы 22 сәуір 00:50

Атырау облысына 2 мың тонна ұн жеткізіледі

АТЫРАУ. ҚазАқпарат – Атырау облысына 2 мың тонна ұн мен 200 тонна күнбағыс майы жеткізіледі, деп хабарлайды ҚазАқпарат.

Атырау облысы әкімінің орынбасары Қайрат Нұрлыбаевтың айтуынша, Батыс Қазақстан облысынан ұн мен күнбағыс майын жеткізу жөнінде келісімшарт жасалған.

«Атырау облысы әкімдігі мен «Азық-түлік келісім шарт корпорациясы» АҚ арасындағы келісімге «Желаев нан өнімдері комбинаты» арқылы өңірдегі наубайханаларға 1-сұрыпты 2000 тонна ұн жыл соңына дейін жеткізіледі. Бұл мекеме осыған дейін де өңірдегі наубайханалар үшін 1-сұрыпты ұнды төмен бағамен беріп келген. Орал қаласындағы «Белес-Агро» кәсіпорнынан 200 тоннаға жуық күнбағыс майын сатып алу үшін келісім жасалды. Алдағы уақытта әлеуметтік маңызы бар ұн, күнбағыс майы секілді өнімдер жергілікті кәсіпкерлер мен «Атырау» әлеуметтік кәсіпкерлік корпорациясы арқылы еш кедергісіз тасымалданады», -дейді Қайрат Нұрлыбаев.

Оның айтуынша, қазір 1-сұрыпты нан бағасы «Дәулет Нан» ЖШС-нің сауда нүктелерінде 90 теңгеден сатылып жатыр.

«Атырау облысының әкімдігі әлеуметтік маңызы бар азық-түлік тауарларымен қамту, бағаны тұрақтандыру үшін өзге өңірлермен, жақын шет елдермен тиісті жұмыстарды ұйымдастырып отыр», -деп мәлім етті Қайрат Нұрлыбаев.

Еске сала кетелік, бұдан бұрын Атырау облысында әлеуметтік маңызы бар азық-түліктің қажетті қоры барын жазған болатынбыз.


Ұқсас жаңалықтар
Автор:
Тілші

Jańalyqtar

MURAǴAT