Астаналықтарды дүрліктіріп, ұтыс ойнатқан гүл дүкені 670 мың теңге төлеп құтылмақ

НҰР-СҰЛТАН. ҚазАқпарат – Өткен жексенбіде 2 мыңнан астам адам ашылуына келген «Romantic» гүлдер орталығының әкімшілігі карантин талаптарын бұзғаны үшін 670 910 теңге төлейді. Бұл туралы Санитарлық-эпидемиологиялық бақылау комитетінің ресми өкілі Ержан Байтанаев айтты, деп хабарлайды ҚазАқпарат тілшісі.

Оның атап өтуінше, елордадағы Мәңгілік ел даңғылы, 47 мекенжайында орналасқан «Romantic» гүл сату орталығы маңында адам көп жиналуына қатысты Есіл аудандық санитарлық-эпидемиологиялық бақылау басқармасы тексеру жүргізіп, карантин талаптарының бұзылғанын анықтаған.

Аталған жоспардан тыс тексеру Бас прокуратураның құқықтық статистика органдарында тіркелген.

«Қазіргі уақытта кәсіпкерлік субъектісіне қатысты тексеру қорытынысы туралы акті, ұйғарым әзірленген және ҚР Әкімшілік құқық бұзу кодексінің 425-бабы 1-тармағы бойынша хаттама рәсімделіп жатыр. Субъекті санатын ескере отырып 230 АЕК мөлшерінде айыппұл белгіленген», - деді Ержан Байтанаев.

Еске сала кетсек, Есіл аудандық әкімдігі мен полиция мамандарынан құралған мониторингтік топ 2 мыңнан астам адамның қатысуымен өткен іс-шарада Нұр-Сұлтан қаласының бас санитар дәрігерінің қаулысын бұзу фактісін анықтады.

Дүкен ашылу құрметіне ұтыс ойынын өткізген.