Астаналықтар жолақысын SMS немесе QR-кодтар арқылы төлей алады

АСТАНА. ҚазАқпарат - Астана LRT қоғамдық көліктегі жол жүру ақысын төлеудің балама жолдарын енгізудің нәтижелерімен бөлісті, деп хабарлайды ҚазАқпарат тілшісі.

«Қыркүйек айында 17 мың жолаушы жол жүру ақысын смс немесе QR-кодтар арқылы төлеп үлгерген. Адамдар көлік карталарына ақша салып, кейде төлемді жылдам енгізе алмайтын кездер болады. 180 теңге төлемес үшін SMS немесе QR-код арқылы төлем жүргізу жолын енгіздік. Адамдар жол ақысын төлеудің осы түрін қазір жиі пайдалана бастады», - деді ұйымның баспасөз хатшысы Науат Азанбаева.

Еске салайық, үстіміздегі жылдың қыркүйек айында қоғамдық көліктердегі жол ақысын төлеудің балама жолдары енгізілген болатын

Жолақыны QR-кодпен төлеу «SMSBus Жолаушы», «Мой Beeline» (егер Beeline абоненті болсаңыз), Homebank (егер сізде Halyk Bank және Qazkom карталары болса) мобильді қосымшалары арқылы жүргізіледі.

Бұған дейін Н. Азанбаева мәлім еткендей, Homebank арқылы төлегенде ақша сіздің телефон теңгеріміңізден немесе банк картаңыздан алынады. Ал «Мой Beeline» қосымшасында - нөміріңіздің балансынан алынады. Тele2 және Altel абоненттері Halyk Bank (Qazkom) клиенттері болған жағдайда Homebank қосымшасын қолдана алады.