Астанада журналистің өліміне қатысты күдікті анықталды

АСТАНА. ҚазАқпарат - Астанада Ирина Бекетова есімді журналистің өліміне қатысты 34 жастағы ер адам күдікті ретінде анықталды, деп хабарлайды ҚазАқпарат тілшісі Астана қалалық ІІД-нің баспасөз қызметіне сілтеме жасап.

Журналистің өлімі туралы әлеуметтік желіде әріптестері хабарлады. Олардың айтуынша, тілшінің соңында үш ұлы мен бір қызы қалған.

«Бүгін әріптесіміз әрі жақын араласқан досымыз Ирина Бекетовадан айырылып қалдық. Артында аңырап үш ұлы және бір қызы қалды. Өкініштісі, Ира әлі жас еді, балалары қанаттанбаған сары ауыз балапан секілді тым кішкентай, тұла бойы тұңғышы Өмірзақ болса, мүгедек, Ақылбегі енді ғана екінші сыныпқа көшті, Жансаясы мен Жанболаты енді үштен асқан, балабақшада», - деп жазады Иринаның әріптестерінің бірі.

Көп кешікпей Астананың құқық қорғаушылары күдіктінің анықталғанын мәлім етті.

«Астана қаласының құқық қорғаушылары 34 жастағы қала тұрғынын сезікті ретінде анықтады. Ол кісі өліміне әкеп соққан, қасақана түрде ауыр дене жарақатын салу күдігіне ілініп отыр. Күдіктіні қолға түсіру үшін барлық шаралар жүргізіліп, қажетті сараптама жұмыстары тағайындалды. Қазіргі таңда сотқа дейінгі тергеу амалдары жүргізіліп жатыр», - делінген хабарламада.