Астанада Жеңістің 77 жылдығына орай отшашу ұйымдастырылды
Астана уақытымен тұп-тура сағат 22:00 кезінде Жеңіс күні құрметіне Есіл өзені жағалауында отшашу атылды.
Қалалық әкімдіктің мәліметінше, Жеңістің 77 жылдығына арналған отшашу демеушілік қаражат есебінен ұйымдастырылған.
Салтанатты рәсім 10-12 минутқа созылды, атылған отшашу көлемі - 3 мыңнан кем емес.
Еске сала кетейік, мұның алдында Нұр-Сұлтан қаласының мәдениет басқармасы 7 және 9 мамыр күндері мерекелік отшашу өткізілмейтінін айтқан болатын. Дегенмен, осыдан екі күн бұрын қалалық әкімдік шешімін өзгертті.
9 мамыр күні қалада сондай-ақ концерт, қойылым түріндегі түрлі онлайн және офлайн іс-шаралар өтті.
Мәселен, Студенттер саябағында ардагерлер мен қала тұрғындарына арналған концерт ұйымдастырылды.
Бұдан бөлек, майдангерлерді еске алуға арналған «Жеңімпаздар. Батырларға тағзым» онлайн-акциясы өтті.
Жеңіс мерекесін атап өту күндері дәстүрлі түрде соғыс ардагерлерінің, тыл еңбеккерлерінің, қоғамдық және жастар ұйымдары өкілдерінің қатысуымен «Отан ана» монументіне және соғыс батырлары – Талғат Бигелдинов, Рақымжан Қошқарбаев, Бауыржан Момышұлы, Мәншүк Мәметова, Әлия Молдағұлова және өзге де батырлардың ескерткішіне гүл дестесін қою рәсімі болды.
Ал 10 мамырда «АЛЖИР» мемориалды-мұражай кешені Жеңіс күніне арналған «Біз Жеңістің ұрпағымыз!» атты лекцияға қосылуға шақырады.
Астаналық цирк мереке құрметіне көрермендер үшін арнайы цирк бағдарламасын дайындады.