Астанада наразылыққа шыққан мұнайшылардың көшбасшылары мәлімдеме жасады

None
Видеодан алынған кадр
АСТАНА. ҚазАқпарат - Астанада наразылыққа шыққан «БерАлы» компаниясының жұмысшылары Жолмұрат Ұлықпанов пен Нұрсұлтан Нұрымов видеоүндеу түсіріп, бүгін санкцияланбаған митинг үшін ұсталған мұнайшылар Маңғыстауға қайтарылатынын жеткізді, деп хабарлайды ҚазАқпарат.

Видеоүндеу әлеуметтік желілерде тарады.

Сондай-ақ олар бұл мәселені Маңғыстауда «ҚазМұнайГаз» компаниясы өкілдерімен бірге комиссия құрып, шешетінін айтты.

«Қазір полиция бөлімінде жүрміз. Келіп отырған келісіміміз бойынша Жаңаөзеннен келген мұнайшылардың бір бөлігін таңертең пойызбен, бір бөлігін ұшақпен елге қайтарамыз. ҚазМұнайГаз өкілдерімен ақылдасып, Өзенмұнайгаз және тендер мәселесін комиссия қарайтын болды. Санаулы 4-5 адаммен осында қалып, келісімшартқа қол қою мәселесімен айналысамыз», - дейді видеода Жолмұрат Ұлықпанов.

Мұнайшылар Жаңаөзендегі қолдаушыларын заңсыз әрекетке бармауға және үйлеріне қайтуға шақырды.

Еске сала кетейік, кеше Энергетика министрлігі ғимаратының алдына 70-ке жуық жаңаөзендік («Бералы Маңғыстау Company» компаниясының бұрынғы қызметкерлері) жиналды.

Бүгін Энергетика министрі Алмасадам Сәтқалиев Үкімет отырысынан кейін БАҚ өкілдеріне берген сұхбатында ведомство ғимаратының маңайында түнеп шыққан жаңаөзендік жұмысшылардың талабы бойынша ресми шешім әзірленіп жатқанын айтты.

Бұл мәселеге пікір білдірген вице-премьер Алтай Көлгінов заң аясында әрекет ету қажеттігін, «тендерден ұтылған компанияның қайтадан ұтып шыққанын талап ету» дұрыс еместігін айтты.

Бүгін кешке Энергетика министрлігі алдына жиналған бір топ жаңаөзендік мұнайшыларды полиция ұстап әкетті.


Соңғы жаңалықтар